دواى ئەنجامدانى لێپرسینەوەیەک لەو سەربازە ئۆستڕالیانەى کە بۆ ئەفغانستان نێردرابون، دەرکەوتوە کە (39) هاوڵاتى مەدەنى ئەفغانى بەدەستى ئەو سەربازانە کوژراون. جەنەڕاڵێکى سوپاى ئوسترالیاش دەڵێت: دەبێت کەسوکارى قوربانییەکان قەرەبوبکرێنەوە.

جەنەڕاڵ ئەنگوس کامبێل، سەرۆک ئەرکانى سوپاى ئوسترالیا رایگەیاند: لێپرسینەوەیەک ئەنجامدراوە لەسەر تاوانى جەنگى سەربازانى وڵاتەکەمان لە ئەفغانستان لە نێوان ساڵانى (2005 بۆ 2016) و بۆمان ئاشکرابوە کە لەو ماوەیەدا (39) هاوڵاتى مەدەنى ئەفغانى لەلایەن سەربازانى سوپاکەمانەوە کوژراون.

وتیشى:" ئەمە شەرمەزارییە بۆمان و بەناوى سوپاى ئوسترالیاوە داواى لێبوردن لە ئەفغانییەکان دەکەین".

لاى خۆیەوە، پۆل بریرى تۆن، جەنەڕاڵ لە سوپاى ئوسترالیا، کە یەکێکە لەو کەسانەى ئەو راپۆرتەى ئامادەکردوە و تاوانەکەى ئاشکراکردوە، وتویەتى "دەبێت کەسوکارى ئەو (39) قوربانییە لەلایەن حکومەتى ئوسترالیاوە قەرەبوبکرێنەوە".

تۆن ئاشکرایکردوە، بۆ ئامادەکردنى ئەو راپۆرتەو گەیشتن بەو راستیانە، چاوپێکەوتن (423) کەس لە هاوڵاتى ئەفغانى و سەربازى ئوسترالى کراوە و لێکۆڵینەوە لە (20) هەزار بەڵگە و (25) هەزار دیمەنى ڤیدیۆى کراوە.

لەئێستادا تەنها (400) سەربازى ئوسترالى لە وڵاتى ئەفغانستان ماون و وەک هێزى ئاشتى پارێز لەو وڵاتە رۆڵ دەبینن.