ڤایرۆسی كۆرۆنا لە هێرشەكەی بۆ سەر جیهان بەردەوامە، تائێستا چارەسەر یاخود ئامڕازێك بۆ روبەڕوبونەوەی نەدۆزراوەتەوە؛ جگە لە رێنماییە خۆپارێزیەکان، رۆژانەش ژمارەی توشبووانی لە هەڵكشاندایە، ئەوەش وایكردووە چەندین پرسیار و نهێنی لەبارەی ڤایرۆسەكەوە بێ وەڵام بمێننەوە.

لەچوارچێوەی گەشتی گەڕان بەدوای نهێنییەكانی كۆڤید 19، توێژینەوەیەك ئاشكرای دەكات ڤایرۆسەكە زرنگانەوەی گوێ زیاد دەكات، بەجۆرێك (40%) توشبووەكان توشی ئەو حاڵەتەبوون، بەشێكیان لەگەڵ نەخۆشكەوتنیان بۆ یەكەمجار لە ژیانیاندا زرنگانەوەی گوێیان هەبووە.

توێژینەوەكە لە زانكۆی ئەنجیلیا رۆسكین لە بەریتانیا ئەنجامدراوە، چاودێری سێ هەزار و (103) توشبوو بە زرنگانەوەی گوێ لە (48) وڵاتی جیهان كراوە، بەڵام زۆرینەیان خەڵكی ئەمریكا و بەریتانیابوون.

بەپێی ئەنجامەكان (40%) ئەو كەسانە پێشتر زرنگانەوەی گوێیان هەبووە، بەڵام بەهۆی كۆرۆناوە حاڵەتەكە لایان زیاتربووە، هەروەها (54%) بەشداربووەكان دوای چاكبونەوەیان لە ڤایرۆسەكە كێشەی گوێیان چارەسەر بووە.

پسپۆڕەكان نەیانتوانیوە هۆكاری سەرەكی توشبوون بە زرنگانەوەی گوێ ئاشكرا بكەن، بەڵام بەپێی چەند پێشبینییەك پێدەچێت دڵەڕاوكێ و هەستن كردن بە تەنهایی بەهۆی كەرەنتینە كردن و دابڕانی توشبووەكان لە شوێنی گشتی و كەسانی دەروبەریان كاریگەری هەبوبێت لەسەر دەركەوتنی حاڵەتەكە.

ماوەیەك پێش ئێستا كچێكی تەمەن (20) ساڵی ئەمەریكی دوای توشبوونی بە كۆرۆنا باسی لەوەكرد، چەند نیشانەیەكی هەبووە كە پێشتر نەوتراوە و پەیوەندی بە نەخۆشییەكەوە نەبووە، یەكێك لەوانە نەمانی هەستی بیستن بووە.