وتەبێژى وەزارەتى تەندروستى عێراق رایدەگەیەنێت؛ ئەزمونى بەکارهێنانى پلازماى خوێن بۆ توشبوانى سەرکەوتنى بەدەستهێناوە، دەشڵێت: بەردەوام دەبین لەسەر بەکارهێنانى.


ئەمڕۆ دوشەممە، سەیف بەدر، وتەبێژى وەزارەتى تەندروستى عێراق لە لێدوانێکى رۆژنامەوانیدا رایگەیاند:" تەندروستى عێراق بەردەوامە لە بەکارهێنانى پلازماى خوێن بۆ چارەسەرکردنى توشبووانى کۆرۆنا و ئەو هەواڵانەى کە باس لە وەستاندنى ئەو چارەسەرە دەکەن راست نیین". 

ئاشکراشیکرد، کارکردن بە بەکارهێنانى پلازماى خوێن بۆ توشبوانى کۆرۆنا، لە بانکى خوێنى نیشتیمانى لە سەرجەمى پارێزگاکان بەردەوامى هەیە و بەکاردەهێنرێت.

بەدر رونیکردەوەن بەکارهێنانى پلازما ئەزمونێکى چارەسەرییە و یەکێکە لە پڕۆتۆکۆڵەکان بۆ چارەسەرکردنى توشبوانى کۆرۆنا، جگە لە عێراق لە سەرتاسەرى جیهانیش بەکاردەهێنرێت. 

پلازماى خوێن، لەو کەسانە وەردەگیرێت کە توشى ڤایرۆسەکە بون و تێیان پەڕاندوە و دواتر بۆ ئەو کەسانە بەکاردەهێنرێتەوە کە توش بون و بەشێوەیەکى سەخت نیشانەکانى کۆرۆنایان لەسەر دەرکەوتوە.