وەزیرى ئاوەدانکردنەوەى هەرێم رایدەگەیەنێت، لە شەش مانگى سەرەتاى دەستبەکاربونمان لە کابینەى نوێى حکومەت، کۆمەڵێک پڕۆژەى گرنگمان ئەنجامداوە، دەشڵێت: پڕۆژە ستراتیژیە راگیراوەکانى کابینەکانى پێشومان بە گەڕخستوەتەوە و ئەوکاتەى پارە هەبوە وەک پێویست کارنەکراوە و نەتوانراوە خزمەت بکرێت.

دانا عەبدولکەریم وەزیرى ئاوەدانکردنەوە و نیشتەجێکردنى حکومەتى هەرێم لە چاوپێکەوتنێکدا لەگەڵ رادیۆى دەنگى گۆڕان رایگەیاند، ئومێدەوارین بتوانین پڕۆژە ستراتیژیەکان کە پلانى چوار ساڵى ئێمەیە بتوانین جێبەجێیان بکەین و رێگا دوو سایدەکان لە تەمەنى ئەم کابینەیەى حکومەتدا تەواو بکەین.

لەبارەى خراپى رێگاوبانەکانى هەرێم وەزیرى ئاوەدانکردنەوە رایگەیاند، خراپى رێگاوبانەکان پەیوەندى بە کابینەکەى پێشوەوە هەیە کە کارەکانیان بە باشى ئەنجام نەداوە و لەئێستادا بەشێکى پڕۆژەکانى کابینەکانى رابردو تەواو نەکراوە.

وتیشى؛ کابینەکانى رابردو ئەرکەکانیان تەواو نەکردوە، لەکاتێکدا داهاتێکى زۆر باش لە هەرێمى کوردستان هەبوە و وەزارەتەکان دەسەڵاتێکى زۆریان هەبوە لە روى ماددیەوە کە بتوانن رێگاوبانەکانى هەرێم باش بکەن.

دانا عەبدولکەریم راشیگەیاند، ئەوکاتانەى پارە هەبوە وەک پێویست کارنەکراوە و نەتوانراوە خزمەت بکرێت، لەئێستادا بەشێک لە کارەکانى ئێمەش بەگەڕخستنەوەى پڕۆژە ستراتیژە راگیراوەکانى رابردوە.

وەزیرى ئاوەدانکردنەوەى هەرێم لەبارەى دروستکردنى هێڵى ئاسنین و ئەو رەخنانەى لەوبارەیەوە هەن، وتى: هێڵى ئاسنین پڕۆژەیەکى خەیاڵ پڵاوى نییە و بەرنامە و پلانى بۆ دانراوە، ئێمە پلانێکمان دانەناوە  قابیلى جێبەجێ کردن نەبێت، بێگومان ئەو پلانە بەحکومەتى هەرێم جێبەجێ ناکرێت، بەڵکو دروستکردنى هێڵى ئاسنین بە سێ قۆناغ جێبەجێ دەکرێت لەلایەن کەرتى تایبەتەوە و بەهاوکارى حکومەت.