لیژنەکانى قائیمقامیەت دوو ریستۆرانتى سلێمانى دادەخات

12:13 - 14/07/2020
کوردستان

به‌هۆی پابه‌ند نه‌بون به‌مه‌رج و رێنماییه‌كانی كاركردن و سه‌رپێچی كردن له‌ رێكاره‌كانی خۆپارێزی له‌ ڤایرۆسی كۆرۆنا، لیژنه‌كانی قائیمقامیه‌تی سلێمانی دو ریستۆرانت داده‌خات و هۆشیاریش به‌ سه‌رجه‌م شوێنه‌كان ده‌دات.

ئەمڕۆ سێشەممە، لە راپۆرتێکدا لیژنه‌ی ریستۆرانتەکان لە قائیمقامیه‌تى سلێمانى رایگەیاند، شەوى رابردوو له‌كاتی سه‌ردانی لیژنه‌كه‌ بۆ ریستۆرانت و شوێنه‌ گه‌شتیارییه‌كان، ده‌ركه‌وتوه‌ هه‌ردو ریستۆرانتی (سایه‌گوڵی 2) و (VIP) له‌ گه‌ڕه‌كی سه‌رچناری شاری سلێمانی، پابه‌ند نەبوون به‌ مه‌رج و رێنماییه‌كانی ته‌ندروستی و رێكاره‌كانی خۆپارێزی له‌ڤایرۆسی كۆرۆنا.

لیژنه‌كه ئاماژه‌ی به‌وه‌كردوه‌، به‌فه‌رمانی قائیمقامی سلێمانی هه‌ردو ریستۆرانتی (سایه‌گوڵی2) و (VIP) داده‌خرێن و خاوه‌نه‌كانیشیان روبه‌ڕوی رێكاری‌ یاسایی ده‌كرێنه‌وه‌.

بەپێى رێنماییەکانى ژوری ئۆپراسیۆنه‌كانی روبه‌ڕوبونه‌وه‌ی ڤایرۆسی كۆرۆنا له‌ شاری سلێمانی، پێویسته‌ ئه‌و شوێنانه‌ی به‌مه‌رجی پابه‌ندبون كراونه‌ته‌وه،‌ سه‌رجه‌م مه‌رجه‌كانی ته‌ندروستی و رێكاره‌كانی خۆپارێزی له‌ شوێنه‌كه‌یاندا جێبه‌جێ بكه‌ن، به‌پێچه‌وانه‌وه‌ له‌لایه‌ن لیژنه‌كانه‌وه‌ داده‌خرێت.



2699 جار خوێندراوەتەوە