وەفدێکى یەکێتى سەردانى گۆڕان دەکات

04:29 - 30/06/2020
کوردستان

رێکخەرى ژورى رۆژنامەوانى بزوتنەوەى گۆڕان رایگەیاند، رۆژى(1/7/2020) وەفدێکى باڵاى یەکێتى سەردانى  مەکۆی سەرەکی بزوتنەوەی گۆڕان دەکات و هەردوولا پرسی ژیان و گوزەرانی هاوڵاتیان و موچەخۆران تاوتوێ دەکەن.

لە لێدوانێکی رۆژنامەوانیدا، دلێر عەبدولخالق رێکخەری ژوری رۆژنامەوانی بزوتنەوەی گۆڕان، رایگەیاند، بڕیارە کاتژمێر (11)ی پێش نیوەڕۆى رۆژی چوارشەمە (1/7/2020)، وەفدێکی باڵای یەکێتی نیشتیمانی کوردستان بەسەرۆکایەتی لاهور شێخ جەنگی هاوسەرۆک و ژمارەیەک لە ئەندامانی مەکتەبی سیاسی ئەو حزبە، سەردانی مەکۆی سەرەکی بزوتنەوەی گۆڕان بکەن و، لەگەڵ عومەر سەید عەلی رێکخەری گشتی بزوتنەوەى گۆڕان و ژمارەیەک لە ئەندامانی خانەی راپەڕاندن کۆببنەوە.


رێکخەرى ژورى رۆژنامەوانى بزوتنەوەى گۆڕان ئاماژەى بەوەشکرد، پرسی ژیان و گوزەرانی هاوڵاتیان و موچەخۆران، پەیوەندییەکانی هەردوولا، باشترکردنی پەیوەندی سیاسی نیوان لایەنەکان، چاکسازی و ئاڵنگارییەکانی بەردەم هەرێم و رێککەوتنی حکومەتی خوجێی سلێمانی بابەتی گفتوگۆى سەردانەکە دەبن.

921 جار خوێندراوەتەوە