بزوتنەوەی گۆڕان: کاتی پاساوهێنانەوە نەماوە و تاکە چارەسەر چاکسازییە

05:19 - 29/06/2020
کوردستان

کۆبونەوەی شاندی باڵای بزوتنەوەی گۆڕان و پارتی دیموکراتی کوردستان کۆتایی هات و ئەندامێکی خانەی ڕاپەڕاندنی بزوتنەوەکەش دەڵێت کاتی پاساوهێنانەوە نەماوە و تاکە چارەسەر چاکسازییە.

 

لە دوای کۆبونەوەکە هەریەکە لە دەرباز محەمەد ئەندامی خانەی ڕاپەڕاندن و مەحمود محەمەد وتەبێژی پارتی قسەیان بۆ رۆژنامەنوسان کرد و دەرباز محەمەد ڕایگەیاند، رێکەوتنی ئێمە و پارتی لەسەر بنەمای چاکسازییە و هەردوولاشمان پشتگیری دەکەین، بەڵام بەڕای ئێمە پرۆسەی چاکسازی بە خاوی دەڕوات و کێشەی زۆر زۆرە.

 

ئەندامەکەی خانەی ڕاپەڕاندن ئاشکراشیکرد بەشێکی زۆری کێشەکان پەیوەندی بە ناتەبایی نێوان پارتی و یەکێتیەوە هەیە و پێویستە چارەسەربکرێت چونکە ئەو ناکۆکیانە کاریگەری زۆری کردۆتە سەر پەرلەمان و دەزگاکانی دیکەش.

 

هاوکات مەحمود محەمەد وتەبێژی پارتی دیموکراتی کوردستان ڕایگەیاند ئێمە و گۆڕان پشتگیری حکومەتین بۆ ئەنجامدانی چاکسازی  و یاساکە لە سەرەتای مانگی داهاتوو دەچێتە بواری جێبەجێکردنەوە.

 

لە وەڵامی پرسیارێکی پەیامنێری دیجیتاڵ میدیای کەی ئێن ئێندا مەحمود محەمەد ڕایگەیاند، ئێمە وەک پارتی پشتگیری یاسای چاکسازین، لەکاتی جێبەجێکردنی یاساکەش دەردەکەوێت کێ دژە.

ئەوە لەکاتێکدایە بزوتنەوەی گۆڕان بە ئامانجی جەختکردنەوە، لە دەستپێکردن بە پڕۆژەیەکی چاکسازى گشتگیر لەسەرجەم بوارەکاندا، بەردەوامە لە کۆبونەوە و سەردانکردنی لایەنە سیاسیەکان و بڕیارە رۆژی چوارشەممە لەگەڵ یەکێتی نیشتیمانی کوردستاندا کۆببێتەوە.

 

هەولێر-بڕیار نامیق
855 جار خوێندراوەتەوە