جەمال حاجی محه‌مه‌د: ئەم کاتى قەیرانە دەرفەتێکى باشە بۆ جێبەجێكردنی چاكسازییەكان

03:45 - 04/06/2020
کوردستان

ئەندامێکی خانەی راپەڕاندنی بزوتنەوەی گۆڕان رایدەگەیەنێت، بە داوای چاکسازی و بەرنامەیەکی سیاسی رونەوە چوینەتە حکومەت، دەشڵێت: پێویستە فشار بکەین بۆ جێبەجێکردنی ئەو بەرنامە چاکسازییەی هەمانە بیخەینە بواری جێبەجێکردنەوە.

جەمال حاجی محەمەد ئەندامی خانەی راپەڕاندنی بزوتنەوەی گۆڕان، لە چاوپێکەوتنێکدا دەڵێت: بزوتنەوەى گۆڕان کە چووەتە ناو ئەم حكومەتەوە داوای چاكسازی كردووە‌ و بەرنامەیەكی سیاسی روونمان هەیە‌ و موافەقەتیش لەسەر بەرنامەكەمان كراوە لە ناو حكومەتدا.

وتیشى: لەم كاتەدا كە قەیران هەیە فرسەتێكی باشە بۆ جێبەجێكردنی چاكسازییەكان و جگە لە داخوازییەكانی خەڵك‌ و ئەو دروشمەی هەڵمانگرتووە ناچینە ژێر باری هیچ شتێكی تر.

لە چاوپێکەوتنەکەیدا کە لەگەڵ (زەمەن) ئەنجامیداوە، جەمال حاجی محەمەد ئەوەش دەخاتەڕوو، کە ئەوان وەک بزوتنەوەى گۆڕان هەمیشە رەخنەیان گرتوە‌و كەموكوڕییەكانی دەسەڵاتیان خستوەتە بەردەست، ئێستاش کە لە حكومەتن دەبێت لە كەموكوڕییەكانی حكومەت بێدەنگ نەبن‌.

لەبارەی ئەوەی لەم دۆخە سەختە داراییەدا جێبەجێکردنی پڕۆژە و بەرنامەکانی گۆڕان سەخت نییە، جەمال حاجی محەمەد دەڵێت:" قورسە، بەڵام دەبێت فشار بكەین، لەگەڵ ئەوەشدا ئێمە چوار وەزیرمان هەیە‌ کە شەو و رۆژ لە خزمەتی خەڵكدان، کۆی حکومەتیش ئامادەیی نیشانداوە بۆ چاکسازی و چەند جارێك تەئكیدیان لە پرۆژە چاكسازییەكەی ئێمەش كردوەتەوە".

جەمال حاجی محەمەد لەبارەی ئەو کۆبونەوانەی رابردو کە لەگەڵ هەریەکە لە پارتی و یەکێتی ئەنجامیانداوە، دەڵێت: ماوەیەك لەمەوبەر تیمی حكومەتی ئێمە لەگەڵ تیمی یەكێتی كۆبوەتەوە‌ و دوێنش تیمەكەمان لەگەڵ تیمی پارتی كۆبوەوە، هۆكاری كۆبونەوەكەش ئەوەیە دەمانەوێت پێداچونەوەیەك بكەین بەم حكومەتەدا و بەرنامە چاكسازییەكەش بخەینە بواری جێبەجێكردنەوە.





466 جار خوێندراوەتەوە