وەزارەتى دارایى و ئابورى لەبارەى لێدوانى ئەندامێکى ئەنجومەنى پارێزگاى سلێمانییەوە رونکردنەوەیەکى بڵاوکردەوە.

 لە رونکردنەوەکەى وەزارەتى داراییدا هاتووە، رێکەوت زەکی ئەندامی ئەنجومەنی پارێزگای سلێمانی، لە لێدوانێکیدا رایگەیاندووە، ئاوات شێخ جەناب وەزیری دارایی و ئابوری رێگری کردووە بەرێوەبەری گەنجینەکانی سلێمانی داتا و زانیاری داھات بدەن بە لیژنەی لامەرکەزی.

لەو بارەیەوە وەزارەتى دارایى دەڵێت، “بە پێویست و گرنگمان زانی ئەم رونکردنەوەیە بۆ راى گشتى بخەینە روو، یەکەم، لیژنەی لامەرکەزی بەپێی یاسا بە وەزارەتی دارایی و ئابوریی نەناسێنراوە، تاوەکو ھاوکاری پێویستی بکات و زانیاری بداتێ،

دووەم، بەپێی یاسا، خەزێنەکان و بانکی ناوەندی ھەرێم ناتوانن ھیچ زانیارییەک بدەن بەھیچ لایەنێک،  چونکە بەپێی یاسای پارێزگاکانی ھەرێمی کوردستان  ژمارە (3)ى ساڵی 2009 ى ھەموارکراو  پاڵپشت بە بڕگەکانی  مادەی (6) پێویستە نوسراو ئاراستەی وەزارەتمان بکرێت و ھەماھەنگی دروست بکرێت، تەنانەت پەرلەمانی کوردستان کە بەرزترین دەزگای یاسادانان و چاودێرییە بەھەمان ڕێسا کاردەکات، واتە ئەبوایە ئەنجومەنی پارێزگا بەھەمان ئاراستە بجوڵێتەوە بۆ ئەوەی ھەماھەنگی بکرێت، (بەرێوەبەری بانکی ناوەندی ھەرێم (سلێمانی ) ئەم رونکردنەوەی بۆ لیژنەکەتان داوە کە داواکارییەکەتان داوایەکی نایاساییە”

وەزارەتى دارایى لە رونکردنەوەکەیدا دەشڵێت “جێگای سەرسوڕمانە کە ئەنجومەنی پارێزگا ئاگادارنەبێت کە تەواوی زانیاری لەسەر داھات و خەرجی لە خەزێنەکان و بانکی ناوەندی ھەرێم ( سلێمانی ) نیەو خەزێنەکان تەنھا ئاگاداری خەرجییە مەڵبەندییەکانن و زانیاری وردو دروستیان لانیە”.

هاوکات وەزارەتى دارایى ئاماژەى بەوەشکردووە، پرسی لامەرکەزی لە دوتوێی بەرنامەی حکومەتدایە کە ھی ھەمو لایەنەکانە بەتایبەت سێ لایەنی  پێکھێنەری حکومەت، بۆیە نەداھێنانێکی نوێیە و لیژنەی باڵای جێبەجێکاری بەرنامەکەش ئەنجومەنی وەزیرانە، واتە ھەرسێ لایەنی سەرەکی پێکھێنەری حکومەت.

لە کۆتایى رونکردنەوەکەشدا هاتووە” ئەنجومەنەکانی ھەرسێ پارێزگای ھەولێر و سلێمانی و دھۆک گەواھی ئەوە دەدەن کە وەزیری دارایی و ئابوری داکۆکیکارێکی سەرسەختی پرەنسیپی لامەرکەزییە و ھەرلەسەرەتاوە لە کارە لە پێشینەییەکانی بووە.