ئەمەریکاى سزاى بەسەر (9) کەسایەتى ئێراندا سەپاند

09:31 - 20/05/2020
جیهان

 

ویلایەتە یەکگرتووەکانى ئەمەریکا سزاى بەسەر (9) کەسایەتى ئێراندا سەپاند و لە نێویشیاندا عەبدولرەزا رەحمانى وەزیرى ناوخۆى ئەو وڵاتە هەیە.

 

 وەزارەتى خەزێنەى ئەمەریکا لەبەیاننامەیەکدا ڕایگەیاند، سزاکانى ئەمجارەى ئەمەریکا ژمارەیەک بەرپرسى ئەمنى فەیلەقى قودسى سەر بە سوپاى پاسدارانى ئێران و چەند  گروپێکى ئەو وڵاتەى  گرتووەتەوە، کە عەبدولرەزا رەحمانى وەزیرى ناوخۆشى تێدایە.

 

هەر لە لیستى سزادراوەکانى ئەمەریکادا هەریەکە لە سندوقى هاریکارى هێزى کۆمارى ئیسلامى و زیندانى ناوەندى تاران و زیندانى قرشک لە ناوەڕاستى تارانى پایتەخت ناویان هاتووە.

 

لاى خۆشیانەوە دەسەڵاتدارانى ئێران، واشنتن بە پێشێلکردنى ڕێککەوتنە نێودەوڵەتییەکان تۆمەتبار دەکەن، بەتایبەت لە بوارى ئابڵوقەى ئابورى و تەندروستى سەر ئێراندا.

 

ئیدارەى ئەمەریکا لەسەرەتاى دەستبەکاربوونى دۆناڵد ترەمپ وەک سەرۆکى ئەو وڵاتە لەساڵى (2017)وە زنجیرەیەک فشارى ئابورى و بازرگانى کردووەتە سەر تاران بۆ راگرتنى بەرنامە ناوەکییەکەى ئێران، لەو چوارچێوەیەشدا چەندین کەس و لایەنى سیاسى نزیک لە ئێرانى سزا داوە.

331 جار خوێندراوەتەوە