لە درێژەی بەسەرکردنەوەی مەرزە نێودەوڵەتیەکانی هەرێمی کوردستاندا،ئەمڕۆ ئاوات شێخ جەناب وەزیری دارایی و ئابوری حکومەتی هەرێم سەردانی مەرزی نێودەوڵەتی حاجی ئۆمەران دەکات.

یاسین واحید بەڕێوەبەری گشتی دیوانی وەزارەتی دارایی وئابوری بە دیجیتاڵ میدیای KNN ی ڕاگەیاند، سەردانەکەی وەزیری دارایی لە درێژەی ئەو سەردانانەدایە، کە پێشتر بۆ هەریەکە لە مەرزەکانی باشماخ و پەروێزخان ئەنجامیدابوو،بەمەبەستی ئاگاداربوون لە جێبەجێکردنی رێنماییەکانی لێژنەی باڵای ڕوبەڕوبونەوەی کۆرۆنا.

بەڕێوەبەری گشتی دیوانی وەزارەتی دارایی وتیشی، وەزیری دارایی لە سەردانەکەیەدا، لە چۆنیەتی جێبەجێکردنی رێنماییەکان و پشکنینی ئۆتۆمبیل و شۆفێرە ئێرانییەکان دەکۆڵێتەوە،ئەوەش لە پێناو زیاتر سەلامەتی هاوڵاتیان.

ئاماژەی بەوەشکرد، وەزیری دارایی ئابوری حکومەتی هەرێم لەسەردانەکەیدا چاودێری چۆنیەتی ڕێکخستنی جوڵەی بازرگانی و هاتنی کەلوپەل و شمەک دەکات لەمەرزی حاجی ئۆمەران.

ئەوە لەکاتێکدایە لە چەند رۆژی ڕابردووشدا، ئاوات شێخ جەناب وەزیری دارایی ،سەردانی هەریەکە لە مەرزەکانی باشماخ لە سنوری قەزای پێنجوێن و مەرزی پەروێزخانی لە ئیدارەی گەرمیان کرد.