وەزارەتی تەندروستی حکومەتی هەرێم رایگەیاند حاڵەتێکی دیکەی کۆرۆنا لە سلێمانی تۆمارکراوە و گەیشتۆتە شەش حاڵەت.

وەزارەتی تەندروستی لە راگەیەندراوێکدا دەڵێت، لە درێژەی ڕێکارەکانی پشکنین بۆ گومانلێکراوان، کەسێکی تر لە هەرێمی کوردستان لە پشکنین دەرچوو هەڵگری ڤایرۆسی کۆڕۆنای نوێ COVID-19 یە.

هاوکات بەڕێوەبەرایەتی تەندروستی سلێمانی رایگەیاندوە توشبووەکە کەسێکی بەساڵاچووە و باری تەندروستی ناجێگیرە.

هەروەها د.سەباح هەورامی بەڕێوەبەری تەندروستی سلێمانی بە دیجیتاڵ میدیای KNN ی راگەیاند توشبووە پێش نوێژی یەکێک لە مزگەوتەکانە و تەمەنی ٧٠ ساڵە.

ئاماژەی بەوەشکردوە توشبووەکە، دانیشتووی شاری سلێمانی دوای نەخۆش کەوتنی و سەردانی پزیشک، گومانی لێکرا.

بەم پێەش ئێستا لە هەرێمی کوردستان شەش نەخۆشی ڤایرۆسی کۆڕۆنای نوێ COVID-19 هەیە و سەرجەمیان لەژێر چاودێری پزیشکی دان.