بزوتنەوەى گۆڕان و ئەنجومەنى وەزیران سەرقاڵى پێکهێنانى دەزگایەکى نوێن بۆ ئەنجامدانى چاکسازى و رووبەروو بوونەوەى گەندەڵى لە هەموو جومگەکانى حوکمڕانى لە بوارەکانى ( دارایى و ئابورى و بەهێزکردنى دەزگاکانى چاودێرى، نەوت، تەندروستى، پەروەردە، وەبەرهێنان و پێشمەرگە).

 کاردۆ محەمەد رێکخەرى ژوورى پەرلەمانى بزوتنەوەى گۆڕان بە رۆژنامەى زەمەنى راگەیاندوە، دروستکردنى ئەو ئەنجومەنە لەسەر بنەماى ریکەوتنى نێوان بزوتنەوەى گۆڕان و پارتى دیموکراتى کوردستانە بۆ پێکهینانى حکومەت لەسەر بنەماى ئەنجامدانى چاکسازى و دروستکردنى ئەنجومەنیک بۆ ئەو مەبەستە.

ئاماژەى بەوەشکردوە، لیژنەکەى بزوتنەوەى گۆڕان پێکهاتوون لە جەلال جەوهەر ئەندامى خانەى راپەڕاندن و سەرۆکى لیژنە و ئەندامێتى کاردۆ محەمەد و بەهار مەحمود، لیژنەکەى حکومەتیش لە لایەن د. ئومێد سەباح سەرۆکایەتى دەکرێت و سکرتێرى ئەنجومەن و گروپێک لە راوێژکارانى پارتى و یەکێتى لە ئەنجومەنى وەزیران ئەدامن.

سەبارەت بە بۆچوونى حکومەت لەسەر پێکهێنانى ئەنجومەنەکە، کاردۆ محەمەد ئاماژەى بەوەکردوە، یەکێک لە سیما دیار و گرنگەکانى ئەم کابینەیە داننانە بەوەى کە لە کوردستان قەیران و کێشەى گەورەى گەندەڵى هەیە و پێویستمان بە چاکسازى بنەڕەتى هەیە.

بۆ ئەو مەبەستەش پارتى و یەکێتى رەزامەندن لەسەر پێکهێهانى ئەنجومەنێک بۆ کاروبارى چاکسازى و داوایان لە بزوتنەوەى گۆڕان کردوە کە پەلە لە ئامادەکردنى بکەن و دەزگایەکى رێکوپێک دروست بکەن.

بەپێى زانیارییەکان ماوەى دوو هەفتەیە لیژنەکەى نێوان بزوتنەوەى گۆڕان و ئەنجومەنى وەزیران دروستکراوە و تاکو ئێستا دوو کۆبوونەوەیان لە ئەنجومەنى وەزیران کردوە. سەرەتاش یاسایەک بۆ ئەنجومەنەکە دروست دەکرێت و لە پەرلەمان پەسەند دەکرێت، لە ناو یاسەکەدا هەیکەلى ئەنجومەنەکە و بنەما گشتییەکانى چاکسازى و رووبەروو بوونەوەى گەندەڵى لە هەریم دادەڕێژرێت.