فەرماندەى گشتى هێزەکانى سوریاى دیموکرات داوایەک ئاڕاستەی ڕوسیا و ئەمریکا دەکات و دەڵێت هیوادارە ئەو دوو وڵاتە روسیا و ئەمریکا پابەند بن بە بەڵێنەكانیان و رێگری بكەن لە گۆڕینی دیمۆگرافیای ناوچەكانی سەری كانی و گرێ سپی.

مەزڵوم کۆبانێ، فەرماندەى گشتى هێزەکانى سوریاى دیموکرات هەسەدە لە تویتێکدا رایگەیاند، " هەردوو بەڕێز بینس و پۆمپیۆ جەختیان لە گەڕانەوەی ئاوارەكان بۆ سەرماڵی خۆیان كردۆتەوە بە بێ ئەوەی تووشی ناڕەحەتی بكرێن لەلایەن چەكدارە توندڕەوەكانەوە".
مەزڵوم کۆبانێ دەشڵێت، چاوەڕێی ئەو بەڵێنانەین تا لەلایەن ئەمریکا و روسیاوە بهێنرێنە دی و هیوادارن ئەو دوو وڵاتە پابەندی بەڵێنەکانیان بن.

پیشتریش هەسەدە هۆشداریدابوو کە تورکیا دەیەوێت خێزانی گرووپە جیهادییەکانی سوریا و وڵاتانی تاجیک و چینی ئیغوری لە سەرێکانێ و گرێ سپی نیشتەجێبکات.