محەمەد ڕەوانەی فەڕەنسا دەکرێت

09:20 - 22/10/2019
کوردستان

بڕیارە ئەمڕۆ، محەمەد حەمید، منداڵە بریندارەكەی رۆژئاوای كوردستان، بۆ چارەسەر رەوانەی وڵاتی فەڕەنسا بکرێت.

محەمەد حەمید، یەکێکە لە بریندارانی هێرشەکانی تورکیا بۆسەر رۆژئاوای کوردستان و بەهۆی بەکارهێنانی چەکی قەدەغەکراو لەلایەن تورکیاوە برینداربووە و لە ماوەی رابردوودا بەمەستی چارەسەر هێنرایە هەولێر، بەڵام بەهۆی زۆری برینەکەیەوە ڕەوانەی وڵاتی فەڕەنسا دەکرێت.

 

لە ماوەی رابردووشدا ئاژانسی هاوار له‌ رۆژئاوای كوردستان چه‌ند وێنه‌یه‌ك و به‌ڵگه‌یه‌كی ڤیدیۆیی بڵاوکردەوە كه‌ تیایدا چه‌ند كه‌سێكی مه‌ده‌نی هه‌موو جه‌سته‌یان سوتاوه‌ و ده‌ڵێن: ئه‌و چه‌كه‌ی سوپای توركیا ناوچه‌كه‌ی ئه‌وانی پێ بۆمباران كردووه‌ وه‌كو چه‌كه‌كانی دیكه‌ نه‌بووه‌ و له‌ دورییه‌كی زۆره‌وه‌ خه‌ڵكی سوتاندووه‌.

 

به‌كارهێنانی چه‌كی فۆسفۆری، یه‌كێكه‌ له‌ چه‌كه‌ قه‌ده‌غه‌كراوه‌كان له‌ جیهاندا و كۆمه‌ڵگه‌ی نێوده‌وڵه‌تی به‌ سه‌ختی دژایه‌تی به‌كارهێنانی ئه‌و جۆره‌ چه‌كانه‌ ده‌كات له‌ شه‌ڕو پێكدادانه‌كاندا، به‌و پێیه‌ی چه‌كێكی كۆكوژه‌ و جیاوازی له‌نێوان كه‌سانی مه‌ده‌نی و چه‌كداردا ناكات و ده‌یان كاریگه‌ریی ژینگه‌یی له‌ سه‌ر خاك به‌جێ ده‌هێڵێت له‌گه‌ڵ چه‌ندین زیانی دیكه‌.

 

ئەمەش لەکاتێکدایە، ئێوارەی رۆژی ٩ی مانگ، تورکیا هێرشی زەمینی و ئاسمانی سەر رۆژئاوای کوردستانی دەستپێکرد و دوای ١٢ رۆژ لە بەرگری سەخت، بەهۆی رێککەوتنی ئەمریکا و تورکیا ئاگربەست راگەیاندرا بەڵام لە هێرشەکاندا تورکیا بە سەختی ناوچە کوردییەکانی سەر سنوری بۆردومان دەکرد و چەندی هاوڵاتی مەدەنی شەهید و برینداربوون.

1891 جار خوێندراوەتەوە