خۆبەڕیوەبەری باکوور و ڕۆژهەڵاتی سووریا حاڵەتی ئامادەباشی ڕاگەیاندووە و داوا لەهەموو پێکهاتەکانی ڕۆژئاوا دەکات بە ئەرکی خۆیان هەڵبسن.

لە ڕاگەیەندراوەکەدا هاتووە "بە بەرزبوونەوەی ئاستی هەڕەشەکان و هێرشە سەربازییەکانی سوپای دەوڵەتی تورک و بەکرێگیراوەکانیان بە ناوی 'سوپای نیشتمانی سوریا' بۆ هێرشکردنەسەر باکوور و ڕۆژهەڵاتی سووریا، وەک بەڕێوەبەری باکوور و ڕۆژهەڵاتی سووریا بۆ سێ ڕۆژ دۆخی سەفەربەری (ئامادەباشی) ڕادەگەینین، هەروەها داوا لە هەموو بەڕێوەبەری، ڕێکخراوەکان و گەلی هەموو پێکهاتەکان دەکەین کە، ڕوو لە ناوچە سنوورییەکان بکەن، تا ئەرکە ئەخلاقییەکانییان جێبەجێی بکەن و لەم ساتە هەستیار و مێژووییانەدا، بەرخۆدانی خۆیان پەیڕەو بکەن".

ڕاگەیندراوەکەدا ئەوەش هاتووە "بەرپرسیارێتی ئەو ڕووداوانە لە ئەستۆی نەتەوە یەکگرتووەکان و هەموو ڕێکخراوەکانی، دەوڵەتی ئەمریکا، یەکێتی ئەوروپا، ڕوسیا، هەموو دەوڵەت و دامەزراوەکانی خاوەن بڕیار و کاریگەرن لە سوریا، پێویستە ئەو ڕێکخراو و دەوڵەتانە، ئەرکی ئەخلاقی و ویژدانی خۆیان جێبەجێ بکەن تا کارەساتێکی مرۆیی کە زیان دەگەینێت بە گەلانی باکوور و ڕۆژهەڵاتی سووریا ڕوونەدات".