سەرۆکی پەرلەمانی عێراق لە وتارێکدا لەبارەی خۆپیشاندانەکانەوە ڕایگەیاند، حکومەت بە خێرایی کار لەسەر نەهێشتنی بێکاری و دامەزراندن دەکات.

محەمەد حەلبوسی، لە تارەکەیدا وتی "لەگەڵ وەزیری كار و پارێزگاری بانكی مەركەزیدا ڕێكارەكانمان دیاری كرد بۆ چارەسەركردنی كێشەی بێكاری و دامەزراندنی خاوەن بڕوانامەكان".

ئاماژەی بەوەشکرد، گوێ لە تەواوی داواکارییەکانی خۆپیشاندەران گیراوە و بەباشی وردبینی دەکرێت و کار لەسەر خواستی خەڵک دەکرێت.

خۆپیشاندان چەندین ڕۆژە لە شارەکانی عێراق بەردەوامە و تا ئێستا زیاتر لە ١٠٠ خۆپیشاندەر کوژراون و زیاتر لە چوار هەزار کەسی دیکەش برینداربوون، لەدوای ئەم ئاڵۆزیانە بەمەبەستی رازیکردنی خۆپیشاندەران و هێوردکردنەوەی دۆخی بەغدا و شارەکانی دیکەی عێراق، ئەنجومەنی وەزیران چەند بڕیارێکی دەرکرد و بڕیاریدا موچەی مانگانە بداتە بێکاران و ١٠٠ هەزار یەکەی نیشتەجێبوون دروستبکات و ١٧ هەزار زەوی بەسەر هاوڵاتییاندا دابەشبکات.