دوای بڵاوبوونەوەی گرتە ڤیدیۆیەک لە تۆڕە کۆمەڵایەتییەکان کە دەردەکەوێت کچێکی ١١ ساڵان لە پیاوێک مارە (سیغە) دەبڕێت کاردانەوەی توندی ئێرانییەکانی بەدوای خۆیدا هێنا و وەک تاوانێک ناوزەندکراوە.

لەو گرتە ڤیدۆییەدا کە لە شاری بەهمەنی سەر بە پارێزگای کەهگیلۆیە و بۆیرئەحمەدی ئێران تۆمار کراوە، دەردەکەوێت کەسێک ئەو کچە منداڵە و پیاوەکە لەیەک مارەدەکات بە ئامادەبوونی کەسوکاری هەردوولا.

یەکەمجار ئەم ڤیدیۆیە لەلایەن جەواد حەدەریا، ڕۆژنامەنووسی ئێرانی بڵاوکراوەتەوە لە تۆڕی کۆمەڵایەتی تویتەر و ڕایگەیاندووە، دادگای ئەو شاری بەهمەن ئاگاداری ئەم ڕووداوە نییە و لە دەرەوەی دادگا ئەو مارە بڕینە (سیغە) کراوە.

وتوشیەتی "دادگای ئەو شارە ئەم ڕووداوەی بە تاوان ناوزەندکردووە و پەراوی لێکۆڵینەوەی بۆ کراوەتەوە".

هاوسەرگیری کاتی یان سیغە، جۆرێک هاوسەرگیرییە کە پەیوەستە بە کاتێکی کەمی دیاریکراوەوە بە بڕە پارەیەک یان شتێکی بەبایەخ، لە دوای کۆتایی هاتنی ئەو ماوەیە هاوسەرگیرییەکەش هەڵدەوەشێتەوە.