ئێران بەڕەسمی كشانەوەی لەبەشێك لەڕێككەوتنە ئەتۆمیەكە ڕاگەیاند

05:30 - 15/05/2019
جیهان

ئەگەر لایەنەكان پابەندی ڕێككەوتنەكە نەبن دەست بەبەرهەمهێنانی ئاوی قورس دەكەینەوە

ئەنجومەنی باڵای ئاسایشی نەتەوەیی ئێران لەبەیاننامەیەكدا بەڕەسمی كشانەوەی لەبەشێك لەڕێككەوتنە ئەتۆمیەكە ڕاگەیاند.


ئەنجومەنی باڵای ئاسایشی نەتەوەیی ئێران لەبەیاننامەیەكدا بڵاوی كردوەتەوە، لەمەودا ئێران بەچەند بەندێكی ڕێككەوتنە ئەتۆمیەكەوە پابەند نابێت، لەبەیاننامەكەدا هاتوە كۆماری ئیسلامی ئێران لەمەودوا پابەندی ئەمباركردنی یۆرانیۆمی پیتێنراوو فرۆشتنی ئاوی قورس بەوڵاتانی دەرەوە نابێت وەك پێشتر لەڕێكەوتنەكەدا پێوەی پابەندبون، ئەوەش تائەو كاتەی سزا لەسەر فرۆشتنی نەوت و مامەڵە دارایی و ئابوریەكانی ئێران هەڵدەگیرێت.

لەبەشێكی تری بەیاننامەكەی ئەنجومەنی باڵای ئاسایشی نەتەوەیی ئێراندا هاتوە، ئەگەر لایەنەكان پابەندی خواست و داواكاریەكانی ئێران نەبن ئەوا تارانیش لەبنكەی ئەتۆمی ئاراك دەست بەبەرهەمهێنانی ئاوی قورس دەكاتەوەو دوا بەدوای ئەوەش قۆناغ بەقۆناغ لەڕێككەوتنە ئەتۆمیەكە دەكشێنەوە. 

1792 جار خوێندراوەتەوە