سەیدسادق: 27 ساڵ بەسەر مەرگی چنار و هێمن تێدەپەرێت

04:30 - 06/01/2019
هەمەڕەنگ

27 ساڵ لەمەوبەر دوو خوێندكاری كەسوكاری ئەنفالی ئاوارەبووی سەید سادق، لەكاتی گەرانەوەیان لەخوێندنگاكەیانەوە بۆماڵەوە بەهۆی بارینی بەفرەوە رێگایان لێ‌ ون دەبێت و پاش مانەوەیان شەوێك لەناو بەفرو بەهۆی سەرماوە گیان لەدەست دەدەن. ساڵانە  دانیشتوانی سەیدسادق و بەڕێوەبەرێتی پەروەردەی قەزاكە بەمەراسیمی جیاواز ساڵیادی ئەو مەرگەساتە دەكاتەوەو بڕیارە ئەمساڵ مەراسیمەكە  چەند چالاكیەكی جۆراوجۆر لەخۆبگرێت.

بیست وحەوت ساڵ لەمەوبەر چنارو هێمن لەدەمەوئێوارەیەكی بەفرو تەماویی زستان خوێندنگا بەجێ‌ دەهیڵن بەئامانجی رۆیشتنەوە بۆماڵەوە، بەهۆی بارینی بەفرەوە رێگایان لێ‌ وون دەبێت‌و شەوێك لەنێو كڕێوە و بەفری زستان دەمێننەوەو بەوهۆیەوە ئەو خوشك وبرایەی كەسوكاری ئەنفال لەسەیدسادق گیان لەدەست دەدەن. دواتر پەیكەرێك بۆ هەردوكیان لەناو بازاڕی سەیدسادق دروستدەكرێت.

(چنار ناسیح علی لە ساڵی 1982 لە دایك بووە) (هێمن ناسیح علی لە ساڵی 1985 لە گوندی برایم غولامی سەربەناحیەی قادر كەرەم لە دایك بووە، بەهۆی شالاوی ئەنفالیشەوە لەسالی 1988 لەنازی باوكیان بێ بەش دەبن)، لە ساڵی 1991 دوای كۆڕەوەكە ئاوارەی قەزای سەیدسادق دەبن و لەئوردوگای شانەدەری نیشتەجێ دەبن، هێمن پۆلی یەكی سەرەتایی بووەو چناریش لە پۆلی چواری سەرەتایی بووە‌و هەردووكیان قوتابی قوتابخانەی سورێن بوون.

ساڵانەش هاوڵاتیان و بەرێوبەرێتی پەروەردەی سەیدسادق بەمەراسیم وچالاكی جۆراوجۆر ئەو یادەدەكاتەوە بریاریشە ئەمساڵ دوایی پشووی تاقیكردنەوەكانی نیوەی ساڵ ڤیستیڤالێكی دوورۆژە بۆ بەرز راگرتنی یادی ئەو دوو خوێندكارە بەرێوە بچێت و چەندین چالاكی ئەدەب و هونەری تێدا ئەنجام بدرێت.

2482 جار خوێندراوەتەوە