قۆناغی نوێ پێویستی بە ئیرادەی نوێ هەیە
لە ململانێوە بۆ دامەزراوەیی 
لە قۆناغێکدا کە هاوکێشەی سیاسیی هەرێمی کوردستان بە دۆخێکی هەستیاردا تێپەڕدەبێت، پێویستە   بزوتنەوەی گۆڕان خۆی لە قۆناغی کاردانەوە بگوازنەوە بۆ قۆناغی دامەزراوەیی و بەرپرسیارێتی. ئەمە تەنها هەڵوێستێکی تاکتیکی نییە، بەڵکوو پێویستییەکی نیشتمانییە.
باوەڕمان وایە کە گۆڕانکاری ڕاستەقینە لە دوو ڕێگەوە دەبێت

 نوێکردنەوەی گوتاری سیاسی
 دامەزراندنی ستراتیژییەکی میدیایی پڕۆفیشناڵ و یەکگرتوو
 
  گوتاری سیاسیی 
گوتاری سیاسی نابێت تەنها لە ناساندنی کێشەکان و ڕەخنەگرتندا بوەستێت. خەڵک ئەمڕۆ چاوەڕوانی چارەسەرە، نەک دووبارەکردنەوەی ئازار.
بۆیە
•  لەبری گوتنی  گەندەڵی هەیە ، دەبێت پڕۆژەیاسا و میکانیزمی بنبڕکردنی گەندەڵی پێشکەش بکرێت.
•  لەبری گوتنی قەیران هەیە، دەبێت پلانێکی دارای و ئابووری بە کات‌بەندیی ڕوون بخەینەڕوو.
گوتاری نوێمان دەبێت جەخت بکاتەوە لەسەر
•  سەروەریی یاسا
•  دادپەروەریی کۆمەڵایەتی
•  پاراستنی مافی تاک
بە زمانێکی سادە، ڕاستگۆیانە و لە نزیک ژیانی ڕۆژانەی هاووڵاتیان.
 
  میدیای ستراتیژی نەک میدیای کاردانەوە
میدیا دەبێت ببێتە پردێک لە نێوان پڕۆژەی سیاسی و جەماوەر، نەک تەنها شوێنی وەڵامدانەوەی هێرشە سیاسییەکان.
میدیای دیجیتاڵ
لە سەردەمی خێرایی زانیاریدا، پەیامەکان دەبێت
•  کورت و ڕوون بن
•  بکرێنە ئینفۆگرافیک و ڤیدیۆی کورت
•  بە شێوازێکی کاریگەر پەیام بگەیەنن
زمانێکی یەکگرتوو
پێویستە هێڵە گشتییەکانی گوتار دیاری بکرێن، تا هەموو هەڵسووڕاوێک بە یەک زمان قسە بکات و دەنگەکان پەرشوبڵاو نەبن.
میدیای خەڵک بۆ خەڵک
میدیا دەبێت ببێتە سەکۆی دەنگی مامۆستا، فەرمانبەر، جوتیار و گەنجان.هتد
کاتێک هاووڵاتی خۆی لە ناو میدیاکەدا دەبینێتەوە، متمانە دروست دەبێت.
 
دەسپێشخەری بەجێی کاردانەوە
لەبری سەرقاڵبوون بە هەر هێرشێک، پێویستە باسە گشتییەکان ئاراستە بکرێن و دەسپێشخەریی سیاسی دروست بکرێت. ئەوەی دەسپێشخەری دەکات، یارییەکە ئاراستە دەکات.
 
باوەڕمان وایە قۆناغی داهاتوو قۆناغی دامەزراوەسازی و متمانەسازییە. ئەگەر ڕێکخستنێکی تۆکمە لەگەڵ میدیایەکی هوشیار و گوتارێکی چارەسەرپێشکەش گرێ بدەین، دەتوانین ئەو ووزە خەوتووەی جەماوەر ببوژێنێینەوە و جارێکی تر ببینە هێزێکی کاریگەر لە هاوکێشەی سیاسیی هەرێمدا.