سەردەمی ژیانەوە و ژیان لەناو مێژوودا

ئەمڕۆ ململانێ سیاسیەکان و ئەگەری شەڕو هەژمونی سەربازی لە جیهان و خۆرهەڵاتی ناوەڕاستدا زۆر کاریگەر و ئاڵۆزن. گۆڕانکاریەکان زۆر و خێرا و بەردەوامن.  لەم هەلومەرجەداو پێشتریش کورد وەک گروپێکی ئێتنی زوڵملێکراوی نێوان چوار یان پێنج دەوڵەتی نەخوازراو هەمیشە قوربانی بووە،ماڵ و زێدی وێرانکراوە، بە چەکی کیمیاوی جینۆساید کراوە، بە پێی ئایەتی قورئان ئەنفال کراوە، لێرە و لەوێ کۆمەڵکوژ کراوە.خوێنی کورد و کچانی حەڵاڵ کراوە.
بەڵام ئەمڕۆ ڕەوشەکە جیاوازە. چونکە پرسی کورد  لە لایەن چەندین  وڵاتو کۆمەڵگای نێو دەوڵەتی یەوە گرنگی پێدەدرێ. ڕۆژ لەدوای ڕۆژ دۆست و هاوسۆزی بۆ دۆزی کورد ڕوو لە زۆربوونە. بەراورد بە ساڵانی شەستەکان  تا هەشتاکانی سەدەی ڕابوردو ، ئێستا دۆستەکانی دۆزی کورد  هەم زیاترن،هەم خاوەن هەژمون و کاریگەرترن لە بڕیاری سیاسی چ لە کۆنگرێس یان لە پەرلەمانی ئەوروپا و پەرلەمانی وڵاتان و ناوەندە گرنگەکانی بازرگانی و هەژمونی ئابوری جیهانی..!
هاوتەیب بەو گۆڕانکاریە لە ناسین و هاوسۆزی بۆ دۆزی کورد، کورد خۆشی بەئاگا تر و هۆشیارترە بەراورد بە ساڵانی دوورتر. ئێستا هەزاران تاکی کورد، لە کرمانج و زازا و هەورامی تا دەگات بە کوردی سنە و سابڵاخ و سلێمانی لە ناوەندە گرنگەکانی زانست و تەکنەلۆجیا و نەخۆشخانەکانی جیهانی دەرەوە وەک نمونەی هەرە بەتوانا خزمەت بە بواری جیاوازی مرۆیی و زانست و هونەر و ئیکۆنۆمی دەکەن.  ئەم لەشکرە لە ئاکادیمیست و پسپۆڕ لە بوارە جیاوازەکاندا، هەریەکەیان و هەموویان پێکەوە سەربازی گومناوی دیبلۆماسی دۆزی کوردن. ئیمڕۆ بەهەزاران کوردی گشت شارو ناوچەکانی سەرتاسەری کوردستان نیشتەجێی وڵاتانی جیهانن.لێرە و لەوێ چەندان پەرلەمانتار و سیاسەتمەدار و بازرگان و میدیاکاری هەڵکەوتو بەتوانا و بەناوبانگی کورد بوونیان هەیە. ئەمانەش لە ناوەندە گرنگەکانی سیاسەت و، هۆڵی پەرلەمانی وڵاتاندا دەورو کاریگەری ڕاستەوخۆیان لەسەر بڕیاری سیاسی سەبارەت دۆزی کورد هەیە. ئەمانە و زۆرێک لەو سامانە مرۆییە لە ڕەوەندی کوردستانی درەنگ یازوو دەبنە نەواتی لەشکری دیبلۆماسی دۆزی ڕەوای کورد.
ئێستا کورد وەک هەنگ جۆشی داوە، وەلێ ئەم جۆش و خرۆشانە، ئەم ڕابونە مێژوییە سەرتاسەریە بۆ ئەوەی نەتیجەی پۆزەتیڤی هەبێت و، خزمەت بە شائامانجی دۆزی کورد بکات، پێویستی بە دروستکردنی پلاتفۆرمی سیاسی واقیعی و هەنگاوی جددی هەیە. هەنگاوە جددیەکانیش سەرەتا لە کوردستانی لای خۆمان ئەوەیە پەلە بکرێ  لە دروستکردنی کابینەیەکی بەرپرسیار و بەهێز. یەکگرتنەوەی هێزەکانی پێشمەرگە لە پێشەمی کارنامەی کابینەی دەیەم بێت، پەرلەمان و دادگاکان، وەک دوو جەمسەری دەسەڵاتی گرنگ کاری لە پێشینەیان دەرچوونی یاسای باش بۆ خزمەتی هاوڵاتیان بێت، نوسینەوەی ڕەشنوسی دەستورو، کارنامەیەکی ڕیفۆرمخواز کە بتوانێ هەنگاو بە هەنگاو، قۆناغ بە قۆناغ  گەندەڵکاران راپێچی بەردەم دادگا بکات.
ئەم دەرفەت و هەلومەرجی ئیمڕۆ، ئەگەر نەتوانین سوودی لێ ببینن، ئەگەر خۆمان سەرقاڵ بکەین بە شەڕی ئایدۆلۆژی و دەستکەوتی کەمبایەخی پلە و پۆست، بە دڵنیاییەوە چارەنوسی پرسی کورد ڕوو لە ئاسۆیەکی تاریک و نادیاری تر دەکات بۆ ماوەیەکی دوورودرێژ ی تر.
بۆیە ئەمڕۆ ڕۆژی کاری جددی و دڵسۆزانەیە، دوور لە ڕۆحیەتی تەنگژەی حیزبی و خۆخۆیی..! 
ئێستا سەردەمێکە هەموومان پێکەوە نەخێری ملیۆنەها ئینسانی کورد ... نەخێر بۆ چەوسانەوەی کورد، نەخێر بۆ دیلێتی و نکۆڵییکردنی کوردبوونمان، نەخێر بۆ جینۆسایدکردنمان بدەین بە گوێی هەموو جیهاندا.
ئەگەر واز لە ململانێی ناشرینی حیزبایەتی بێنین و. لەبری ئەوە دایەلۆگی سەردەمیانە هەڵبژێرین..! ئەو کات بە دڵنیاییەوە هەموو سامانی مرۆیی کوردستانیان لە دیاسپۆرا دەبێتە هێزێکی کاریگەرتر لە هێزەکانی حەفتا و هەشتا. ئەو کات هەر شاخەکان هاوڕێ و پشتوپەنامان نابن.! بەڵکو دەنگ و هاواری ئازادیخوازانەمان لە ڕووپەڕی ڕۆژنامە و ناوەندە میدیاییەکان، لە سەکۆی پەرلەمان و ناوەندە بڕیاربەدەستە سیاسیەکان. لە کۆنگرێس و پانێلی نەتەوە یەکگرتووەکان ، لە تەواوی جیهان زوڵاڵی دەنگی کورد دۆست و دوژمن بەخەبەر دێنێت..! 
ئیدی پرسی کورد قۆناغی مێژوویی گرنگی خۆی تێدەپەڕێنێ و. تولەڕێگای خەباتوتێکۆشانی گشت پارچەکانی کوردستان ڕوو لە شاڕێگای خەباتێکی سیاسی مەدەنی دەکات، کە هەموو کوردێک مادی یا مەعنەویی  بەشدار دەبێت لەو خەباتە. 
ئێستا کاتی ئەوەیە هەموو هێزە سیاسییەکانی کوردستان ، دیالۆگی جددی لەنێوان خۆیان و دەرەوەی خۆیان ساز بکەن بۆ نوسینەوەی پلاتفۆرمی نیشتیمانی و ئاشتەوایی سیاسی و ڕێکەوتننامەی ستراتیژی جەنتڵمانانە.
ئایندەی کورد لە رۆژهەڵاتی نێوەڕاست بە هەر بارێکدا بگوزەرێ، بە پلەی یەکەم بەرپرسیارێتی لە ئەستۆی خۆمانە.! خۆمان بەرپرسیارانە لەگەڵ یەکدا هەڵسوکەوت بکەین. لەگەڵ نەیار و دوژمناندا سیاسەت بکەین. ئەو دەم ئەگەر لە  شەڕیش بدۆڕێن، لە جەنگە گەورەکە دا براوە دەبیت.