لە 25-7-2009 ڕاگەیاندنی بزووتنەوەی گۆڕان وەک  ئامراز و ڕێکخراوێکی  سیاسی جەماوەری و پڕ لەجۆش  و خڕۆش و  وەکو پێداویستی قۆناغ و هەلومەرجی  پڕ  لەتەنگەژە و کەنەفتبونی پڕۆسەی سیاسی و  کایەی حوکمڕانی و تا ئەپەڕەی نیگەڕانی و شکاندنی بەستەڵەکی دڕدۆنگی نێوان سیاسەت و خەڵک و ڕەواندنەوەی ئەو بێ هیوایی و بێ متمانەی سیاسییە کۆمەڵگەی ئێمە سیخناخکردبو.



ئیدی سەرلەنوێ  تیشکی خۆری بەتینی نەمانی  نیگەرانی و تاریکی بەدەرکەوتەوە، بەجۆرێک ڕووحکرایەوە بەدونیایی سیاسەت و شکاندنی بێـدەنگی و بەشداری  بەرفراوانی  خەڵکی کوردستان لەپڕۆسەی سیاسی و گۆڕانکارییەکاندا.



گومانی تێدا نییە دوای سەرکەوتنە یەک لەدوایەکەکانی بزووتنەوی گۆڕان ، نەیار و دوژمنانی گۆڕان و چاکسازی بەوپەڕی هێز و توانایانەوە  کەوتنە پیلانگێڕی و بەئامانجگرتنی بزووتنەوەکە  لەگەڵ ئەوەشدا بەرئەساسی  کۆمەڵێک هەڵەی سیاسی ستراتیژی خودی بزووتنەوەکە  گوشاری زۆری ناوخۆیی و بەهاوکای و یارمەتیدانی دەوڵەت و هێزە هەرێمایەتییەکان کەوتنە گیان و جەستەی بزووتنەوەکە بۆ لەباربردنی بەدیهێنانی ئامانج و هەنگاوەکانی گوڕانکاری و لەپەل و پۆخستنی  جوڵەکانی و دانانی لەمپەر و ئاستەنگ لەبەردەم ئەرک و جێبەجێکردنی بەرنامە و ئەجندای نیشتیمانی و پاکێج و هەوڵەکانی بزووتنەوەی گۆڕان.


هەڵبەتە  بۆ  ڕاستکردنەوەی  ڕێڕەوی ئەزمونی سەرنەکەوتویی حوکمڕانی و بەجێگەیانی بەرنامە سیاسیەکەی و  بەڵێنەکانی چەندان کۆسپ و ڕێگری بۆ  دروستکرا ، تاوەکو  بەتەواوی  بزووتنەوەکە لەسەر گۆڕەپانی سیاسی و ململانیێەکان بسڕنەوە و بۆ هەتا هەتایە  خواست و هیوا بۆ حوکمڕانێکی باش و ژیانێکی شکۆماندانە لەبیر و خەیاڵدانی تاک بەتاکی جڤاتی ئێمە لەگۆڕنێن. بەمانایەک ئاستەنگ و ئاڵنگارانەی بەردەم بزووتنەوەی گۆڕان  وایکرد  فەزای سیاسی هەرێم توشی کەمی و کورتهێنانی سیاسی  کرد و کاریگەری نەرێنی زۆری لە سەر پڕۆسەی سیاسی و  ئەدایی سیاسی و پێگەی هێزەکانی ئۆپۆزسیۆن و ئازادییەکان دانا.


 دیداری 20  ئەیلولی ئەمسال بۆ نەیار و ناحەزەکانی بزووتنەوەی گۆڕان   پەیامێکی ڕوون و وەڵامێکی لۆژیکی و  جەرگبڕانە بوو، لەگەڵ ئەوەشدا  بەڵگەیەکی زیندووە کەهێشتا بزووتنەوەی گۆڕان بەپێوەیە و جێگەی ئومێدی گۆڕانخوازانە...
   

لەو ڕوانگەیەوە بۆ جارێکی دیکە هاونیشتیمانیان توشی  بێهوای و بێ متمانەی سیاسی  بونەتەوە، بەجۆرێکی وەها  پڕۆسەی سیاسی  توشی تەنگەژ و قەیرانگەلی سیاسی و ئابووری و کۆمەڵایەتی کردوە و بەڕادەیەک  ژیان و ئاسایشی کۆمەڵایەتی بگاتە  ئەوپەڕی مەترسیی،  سەرەڕای ئەوەش  دەسەڵات لاوازبوونی بزووتنەوەی گۆڕانی بەهەل و دەرفەت زانیوە  بۆ دژایەتی و لەباربردنی ئازادییە سیاسی و مەدەنییەکان و بەرتەسکردنەوەی مەوادی  ئازادی کاری ڕۆژنامەگەری. 



دوای ئەوەی کەبزووتنەوەی گۆڕان یەکێک لەپڕنسیپە بنەڕەتیەکانی دیموکراسی پەیڕەوکرد و  ئاڵوگۆری دەسەڵاتی لە ڕێکخەری گشتیدا کردە ئامانجی  سەرلەنوێ بەخۆداچوونەوە و چاکسازی و گۆڕانکاری لەگوتار و  سیاسەت و کاری ڕێکخراوەی و گەڕانەوە و دیاریکردنەوەی پڕنسیپە بنەڕەتیەکانی گۆڕان، لەوساوە  بزووتنەوەی گۆڕان  ، زیاد لەچەند جارێک  جوڵە و چالاکی ڕێکخراوەی و سیاسی  لەشاروشارۆچکەکاندا کردوە.


 دیارە یەکێک لەو چالاکییە  گرنگ و  کاریگەرەکانی  بەستنی  دیداری هەڵسوار وگۆڕانخوازانی بزووتنەوەکە بووکە کەلە تەلاری هونەر بەرێوەچوو  ،  کە بەشی هەرە زۆری هەلسواڕا و گۆڕانخوازان لەهەمو ئاستەکان ئامادەیی دیدارەکە بوون و  بەئومیدی زۆرەوە دروشمی" تەنها گۆڕان بەدیلی گۆڕانە"یان دەوتەوە،،  ئەرکی لەمەودوای  بزووتنەوەی گۆڕان  ئەوەیە چۆن ئەو جۆش وخڕۆشە جەماوەرییە و ئامادەبوانی گۆڕانخوازان جارێکی تر دەکاتە دەرفەت و دەستپێکی لەسەرلەنوێ بەهێزکردنەوەی بزووتنەوەی گۆڕان و ئاشتکردنەوەی دەنگدەرەکانی و شەقام و گۆڕانخوازان و دروستکردنی پردی متمانەی نێوان گۆڕان و خەڵکی کوردستان و  دەرئەنجامی دڵخوازی دیدارکە دەکەنە سەرەتای گۆڕانکاری لەبونیادی  خۆڕێکحستەنەوە و گەڕانەوە بۆ ناو خەڵک و دەنگی شەقام و کەرنەنڤاڵی سەرکەوتنەکە  تەوزیف بکرێت بۆ سەرەتا و دەستپێکی هەستانەوەی بزووتنەوەی گۆڕان.