ئاشکرایە کە مێژوی بزوتنەوەی رزگاریخوازی کورد پڕاوپڕە لە دەلاقە و دابەشبون و دوبەرەکی، ھەر لە سەرەتاکانی دەرکەوتنی ئاینی ئیسلامدا، بە پەرت پەرتی خاوەنی چەند دەوڵەتۆکەیەکی نیمچە سەربەخۆبون لە رۆژھەڵاتەوە لە دەوڵەتی 137 ساڵەی (شەدادی) یەوە بگرە بۆ باشور و دەوڵەتی (حەسنەوی) و پاشان بەرەو باکور و دەوڵەتی (مەروانی) .

گەر لاپەڕەکانی مێژوی فەرمانڕەوایی میرنشینە کوردیەکان ھەڵبەینەوە، لە سەردەمی فەرمانڕەوایی ئیمپراتۆریەتی (سەفەوی و عوسمانی)، کورد خاوەنی قەوارەی نیمچە سەربەخۆ و چەند ناوچەیەکی خۆبەڕێوەبەری بون، میرنشینی بەھێز و بەتەمەنی لە وێنەی میرنشینی (ئەردەڵان) ھەبوە کە تەمەن و ھێزێکی درێژ و زۆری ھەبوە بە شێوەیەک تەمەنی نزیکی (٧٠٠) ساڵ و سنوری فەرمانڕەوایەتیەکەی گەیشتوەتە نزیکی شاری بەغدا. 

لاپەڕەکان زیاتر ھەڵدەدەینەوە و گوزەر بەناو میرنشینەکانی بادینان-ی بەتەمەن، میرنشینی سۆران-ی خاوەن کارخانەی چەک، میرنشینی بابان-ی چاوگی بوژانەوە و پەرەسەندنی زمان و ئەدەبی کوردی، میرنشینی ھەکاریی داگیر نەکراو، میرنشینی بۆتان-ی خاوەن (مەم و زین) و سەرچاوەی زانیاری و روناکبیریدا بکەین، دەبینین ھەمو لە یەک خەسڵەتدا لەیەکچون ئەویش دوبەرەکی و خۆخۆرییە. !

لاپەڕەکان لە مێژوی نزیکی شۆڕشە رزگاریخوازەکانی کورد نزیک دەبێتەوە و چاومان ئەچێتە سەر شۆڕشەکانی (شێخ عوبەیدوڵای نەھری، سمکۆ خانی شکاک، شێخ سەعیدی پیران، حەمە رەشید خانی بانە و شێخ مەحمودی حەفید)، خاڵی کۆکەرەوە و توانەوەی زۆریان بریتییە لە ھانابردن بۆ دەوڵەتی بێگانە و دژایەتی و پشت تێکردن و خیانەتی ھەندێ لە ھۆزە کوردیەکان.  !

کۆتایی لاپەڕەکان دێنە سەر شۆڕشەکانی ئەم دواییەی کورد، بەتایبەتی شۆڕشی (ئەیلول و نوێ)ـی کۆمەڵانی خەڵکی باشوری کوردستان، سەرەڕای دوبەرەکی و شەڕی برا کوژی (شاخ و شار) و پاشانیش دو ئیدارەیی و پاشتر حکومەتی یەکگرتوی ھەرێمی کوردستان، ئێستاشی لەگەڵابێت ھاوڵاتیان لە مۆتەکەی دو ئیدارەیی و جارێکی تر دابەشبونی تاکە قەوارەی کوردیدا ژیان ئەگوزەرێنن. !

ئەمڕۆ هاوڕێکەوتە لەگەڵ خاڵێکی وەرچەرخان لە مێژوی رزگاریخوازی گەلی کورددا، ئەویش بەرپابونی شۆڕشێکی سپی ئاشتیخوازانە بو لە باشوری کوردستان، شۆڕشێک کە بەرمەبنای بڕیارێکی راست و بوێرانە و دروستکردنی یەکەمین ھێزی بێچەک و ئۆپۆزسیۆنی کوردی بو، ھێزێک کە ھێڵە گشتییەکانی ھێزێکی نیشتیمانی بەرجەستە کردو و بوە سەرمەشقی بە ئاگا ھێنانەوە و ھۆشیارکردنەوەی کۆمەڵگای باشوری کوردستان، ھێزێک جیاواز لە بیرکردنەوە، جیاواز لە بڕیاردان و جیاواز لە جێبەجێکردندا، جیاواز لە نیشتیمانبینی و دونیابینی و بەڕێوەبردندا لە ھێزە تەقلیدیەکانی کایەی سیاسی ھەرێمی کوردستان، ئەو ھێزە جیاواز و بوێرە بزوتنەوەی گۆڕان بو .

دونیابینی نیشتیمانیانەی ئەم بزوتنەوەیە ھەرێمی کوردستانی چەندین جار لە ھەڕەشەی دروستبونی شەڕی ناوخۆ پاراستوە، ھەر لە سەرەتای دروستبونییەوە بانگەشەی ئاشتیانە و دور لە توندوتیژی جیاوازی (ئێمە و ئەوان) بوە، سیاسەتەکانی لە ھەمبەر بە نیشتیمانیکردنی دەسەڵاتەکانی (ناوخۆ، پەیوەندی دەرەوە، پێشمەرگە، دارایی،سامانی سروشتی) شایانی تێڕامانی نەوەکانی داھاتو و شانازی پێوەکردنن .

تەنھا ھێزی ھەرێمی کوردستان کە دوای چەندین جار بارەگا سوتاندن، گرتن، لێدان، سزادان و نانبڕینی ھەڵسوڕاوەکانی، ئێستاشی لەگەڵدابێ ئامادەی دروستکردنی ھێزی چەکداری حیزبی نەبو. !

تاکە ھێزی باشوری کوردستانە ویستویەتی و دەیەوێ پەیوەندیەکانی لەگەڵ وڵاتانی دەرەوە پەیوەندی نیشتیمانی بن، سەرەڕای فشاری دەوڵەتە ئیقلیمیەکان، دەستبەرداری پرەنسیپی نیشتیمانیانەی نەبوە و نەیویستوە وەکو حزب نوێنەرایەتی لە ھیچ وڵاتێکی دراوسێ و ئیقلیمی ھەبێ، باجی دروستنەکردنی ئەم پەیوەندیانەشی داوە.

تاکە ھێزی باشوری کوردستانە کە لە ھەناوی ھێزێکی تری سیاسیدا ھاتبێتە دەرەوە و نەیھێشتبێت و نەیویستبێت بە هزری تۆڵەکردنەوە کار بکات و پێکدادانی چەکداری روبدات.

لە ساڵوەگەڕی بەیانکردنی لیستی گۆڕاندا، سەری رێز بۆ مامۆستای رێگای چاکسازی و ئەندازیاری راپەڕین و بنیاتنەری بیرۆکەی ئۆپۆزسیۆنی راستەقینە و نیشتیمانیانە (نەوشیروان مستەفا) و هاوڕێکانی دادەنەوێنم، وەک چۆن ئەو جوامێرە و هاوڕێکانی دوای کارەساتی هەکاری بە 42 پێشمەرگەی (چەکدار و بێچەک) لە بناری قەندیلەوە سکشتیان بە سەرکەوتن گۆڕی و تاجی سەرکەوتنەکانی راپەڕینیان نایە تەوێڵی کەرکوکی کوردستان، وەک چۆن دوای شاڵاوەکانی ئەنفال و بێئومێدی هەمو هێزە سیاسییەکان بە ئومێدێکی زۆرەوە بونە داینەمۆی دروستکردنی بەرەی کوردستانی، وەک چۆن دوای بێئومێدی کۆمەڵانی خەڵک لە دەسەڵات، ئومێدیان بۆ هاوڵاتییانی باشوری کوردستان گێڕایەوە و گڕ و تین و متمانەیان بۆ پڕۆسەی سیاسی و هەڵبژاردن لەم بەشەی کوردستاندا گێڕایەوە، ئێستا و لە کاتێکا کە هەرێمی کوردستان پێویستیەکی زۆری بە هێزێکی نیشتیمانیانەی لە وێنەی بزوتنەوی گۆڕان هەیە، ئەبینین پەیتا پەیتا (دۆست و دوژمن) درک بە پێویستی سەرخۆکەوتنەوەی بزوتنەوەی گۆڕان دەکەن، فەرمون هەمو ببنە نەوشیروان مستەفا و متمانە بە دوا پڕۆژەی سیاسی ئەو جوامێرە ببەخشنەوە، لەم رێیەوە متمانە بە دڵ و دەرونی کۆمەڵانی خەڵک ببەخشنەوە، ببنە فریادڕەسی میللەتێک. !