گۆڕان و زینی وەرتێ

چیای زینی وەرتێ کە ئەکەوێتە شارۆچکەی وەرتێی سەر بە پارێزگای ھەولێر، بەھۆی ھەڵکەوتە جوگرافیەکەی و کەش و ھەوا فێنک و سەرنج ڕاکێشەکەی، یەکێکە لە ناوچە گەشتیاریەکانی ھەرێمی کوردستان.


ئەم بەھارە، سەرەڕای بڵاوبونەوەی ڤایرۆسی کۆرۆنا کە گەشتیارانی لەم ناوچە دڵگیرە بێبەش کرد، یەک دوو جموجۆڵی هێزەکانی پێشمەرگەش گرژی و ئاڵۆزییەکی سیاسیی و سەربازی هێنایە کایەوە و ناوچەکە بووە جێی ململانێی و لەبەرامبەر یەکوەستانی سێ پارتی گەورەی کوردی و دواتریش بۆردومانی دەوڵەتی تورکیا.

* لەلایەک ھێزەکانی (پارتی کرێکارانی کوردستان) کە ئەو شوێنە بە گەروی ھاتن و چون و بە شوێنێکی ستراتیژی ئەزانن بۆ ھێزەکانیان.

* لەلایەک ھێزەکانی (یەکێتی نیشتیمانی کوردستان) کە خۆیان لە ھێزەکانی (٧٠) دەبیننەوە، ئەم شوێنە بە قەڵەمڕەوی دەسەڵاتی خۆیان ئەزانن و بە پاشماوەی کاڵبوەوەی زۆنی سەوز و میراتگری ڕێکەوتننامەی واشنتۆنی ساڵی (١٩٩٨).

* لەلایەکی ترەوە ھێزەکانی (وەزارەتی پێشمەرگەی حکومەتی ھەرێم)، ھەروەک لە ڕاگەیەندراوەکەی وەزارەتەکەدا ھاتوە!


ئەوەی جێگای تێڕامانە، ھەردو لایەنی یەکێتی و پارتی کرێکاران ئەم ھێزە بە ھێزی (پارتی دیموکراتی کوردستان) ئەزانن، ئەمە لە کاتێکدایە وەزیری پێشمەرگە یەکێکە لە سەرکردە و پێشمەرگەیەکی دێرین و بە ئەزمونی (یەکێتی نیشتیمانی کوردستان)!


کەچی یەکێتی دڕدۆنگە لە ناوھێنانی ئەم ھێزە بە ھێزی وەزارەتی پێشمەرگە و پێی وایە ھێزی (پارتی دیموکراتی کوردستان)ن و (١٥) کیلۆمەتر سنوری زۆنی سەوزی جارانیان بەزاندوە.

* لەلایەکی ترەوە ھێزە ئاسمانیەکانی تورکیا لە ئاسمانەوە بەردەوامن لەسەر بۆردومانی بنکەکانی ھێزەکانی (پارتی کرێکارانی کوردستان) لە کاتێکدا بنکەکانی ھێزەکانی (یەکێتی) و (پارتی) و (پ ک ک) بە چەند دە مەترێک لە یەکترەوە دورن!

ئەوەی جێگای سەرنج و تێڕامانە ھەردو لایەنی یەکێتی و پارتی، دو پێکھێنەری سەرەکی حکومەتی ھەرێمی کوردستانن! لە ناو حکومەت پێکەوەن و لە دەرەوەی حکومەت سەنگەریان لە یەکتر گرتوە!

تەنھا لایەن کە بە تێڕوانینێکی نیشتیمانیانە و دەوڵەتداریانە داوای چارەسەرکردنی کێشەکەو ئاساییکردنەوەی دۆخەکە ئەکات (بزوتنەوەی گۆڕانە)، ھەر ئەم بزوتنەوەیەیە لە سەرەتای دامەزراندنیەوە لەژێر کاریگەری دامەزرێنەر و ڕابەرە رۆحیەکەی ڕەوانشاد (نەوشیروان مستەفا)دا داوای یەکخستنی ھێزەکانی پێشمەرگە و ڕێکخستنەوەی ھەیکەلی ئیداری و تەنزیمیەکەی ئەکات، بەشێوەیەک بکرێت بە ھێزێکی نیزامی نیشتیمانی ئەوتۆ کە لە ژێر ھەژمون و دەستی حزب دەربھێنرێت و ببێت بە ھێزی بەرگریکاری نیشتیمانی!

ئەمە یەکەمین جار نیە لەو تەنگ و چەڵەمە سیاسیانەی لە ناو ھێزە سیاسیەکانی باشوری کوردستاندا دروست ئەبن، کە بچوکترین ھەڵە لەژێر ھەڕەشە و بەرەو لەباربردنی کۆی ئەزمونەکەو گێڕانەوەی سەردەمی دو ئیدارەیی ڕاپێچمان ئەکات، بزوتنەوەی گۆڕان رۆڵی بەرپرسیارانەی خۆی دەگێڕێت و نیشتمان لە مەترسیەکان دەپارێزیت، هەربۆیە بە ڕونی دەرئەکەوێت "گۆڕان" زەمانی پاراستن و لەبارنەبردن و بە یەکگرتویی مانەوەی کیانی ھەرێمی کوردستانە!

1480 جار خوێندراوەتەوە