پەتای پۆپۆلیزم و باشوری کوردستان

ئاشکرایە، دۆخی ئێستای باشوری کوردستان (هەرێمی کوردستان) پڕاو پڕە لە کێشمەکێشی سیاسی و ئابوری و ئەمنی، لە لایەک پەتای کۆرۆنا و لەلایەکی تر قەیرانی دارایی باڵی کێشاوە بەسەر هزر و ئەندێشەی هاوڵاتیانی ئەم هەرێمەدا، بۆیە بە ئاسانی پۆپۆلیستەکان ناڕەزایەتیە رەواکانی هاوڵاتیان دەقۆزنەوە و بەکاری دەهێنن بۆ ئەو مەرامە سیاسیەی لە ئەندێشەی خۆیاندایە.

پۆپۆلیزم، هەروەک (ژان ڤارنەر میولەر) لە کتێبەکەیدا بە ناوی ( پۆپۆلیزم چیە؟) پێناسەی کردوە؛ جۆرێکە لە تێگەیشتنی سیاسی کە تیایدا کۆمەڵگا دابەشی دوو بەرەی دژ بە یەک دەکات، بەشێکیان پاک و بێگەردن و بەشەکەی تر گەندەڵ و لادەر و دژی بەرژەوەندی ئەو بەشەی دیکە رەفتار ئەکەن، کە خۆیان بە پاک و بێگەرد پێناسە دەکەن.

بەڵام ئەمە بەو واتایە نییە هەر کەسێک رەخنە لە دەسەڵات و دەستەبژێری سیاسی بگرێت پۆپۆلیستە، هەن بە هەمو توانایانەوە یارمەتیدەرن بۆ رزگاربون لەو تەنگژانەی حکومەت تێیکەوتوە و شەونخونی بۆ دەستەبەرکردنی مافە سەرەتاییەکانی هاوڵاتی ئەکەن، هەن رەخنەی بونیادنەر لە دەسەڵات دەگرن و بە پڕۆژە و راسپاردە کار بۆ چاککردنی ئەو کەموکوڕی و گەندەڵی و ناشەفافیەتانەی حکومەت ئەکەن و ناشیکەن بە ریکلام!

بەداخەوە هاوکات لەگەڵ ئەو قەیرانانەی هەرێمی کوردستانی پیێدا تێپەڕئەبێت، دەستە بژێرێک لە کەسانی سیاسی لە هەوڵدان بۆ ئەوەی وەکو رێواسێکی تاڵی درزی تاوێرەکانی ناڕەزایەتی خەڵک سەردەربێنن و سواری تەوژمی توڕەیی و ناڕەزایەتی هاوڵاتیان ببن و هەمو هێزە سیاسیەکانی کایەی سیاسی هەرێمی کوردستان ئەفەرۆز ئەکەن!

بزوتنەوەی گۆڕان تێڕوانینی لەسەر پۆپۆلیزم ڕون و ئاشکرایە ... هەروەک لە تۆمارێکی دەنگیدا دامەزرێنەر و رێبەری رۆحیی بزوتنەوەکە (نەوشیروان مستەفا) دەڵێ: بزوتنەوەی گۆڕان هێزێک نییە رق و بوغزی سیاسی و کۆمەڵایەتی ئاڕاستەی بکات .. ئێمە لە ناوەڕۆکدا کار بۆ کۆتایی پێهێنانی ئەم رق و کینە سیاسیە ترسناکە ئەکەین، کە کۆمەڵگەی ئێمەی لەناوەوە پارچە پارچە کردوە.

روبەڕوبونەوەی ئەم دیاردە جیهانیە (پۆپۆلیستی) پێویستی بە شۆڕشێکی فیکری و دەستەبژێرێکی سیاسی و رۆشنبیری (نیشتیمانی)ـە، کە کۆمەڵگا لەم دیاردە جیهانیە هۆشیار بکەنەوە و وا بکەن کۆمەڵگای کوردی لە دەستێکی ئەمیندا بێت و هاوڵاتی هۆشیار بکرێتەوە لەوەی فریادڕەس و فریودەری راستەقینە کێیە.

388 جار خوێندراوەتەوە