ئەرشەد ساڵحی، سەرۆکی فراکسیۆنی بەرەی تورکومانی لە پەرلەمانی عێراق، داوای مانەوەی هێزە فیدراڵییەکانی لە قەزای خورماتوو و پارێزگای کەرکوک کرد، و جەختی لە پێویستیی پاراستنی سەقامگیریی ئەمنی و نەگرتنەبەری هیچ هەنگاوێک کردەوە کە گرژییەکان بۆ ناوچەکە بگەڕێنێتەوە.

ئەرشەد ساڵحی لە بەیاننامەیەکدا ڕایگەیاند: "بە گرنگییەکی زۆرەوە چاودێریی ئەو دەنگۆیانە دەکەین کە باس لە گۆڕانکاریی چاوەڕوانکراو لە دۆسیەی ئەمنیی هەردوو پارێزگای کەرکوک و سەلاحەدین دەکەن." هەروەها جەختی لەوە کردەوە کە پێویستە ئەو سەقامگیرییە ئەمنییە بپارێزرێت کە بەهۆی قوربانیدانی هێزە ئەمنییەکانەوە بەدەست هاتووە.

سەرۆکی فراکسیۆنی بەرەی تورکومانی داوای لە عەلی فالح زەیدی، سەرۆک وەزیران و فەرماندەی گشتیی هێزە چەکدارەکانی عێراق کرد، هێزە فیدراڵییەکان لە قەزای خورماتوو و پارێزگای کەرکوک بهێڵێتەوە، و دەسەڵاتی حکومەتی فیدراڵی بەسەر تەواوی سنوورە کارگێڕییەکاندا بەردەوام بێت، بە جۆرێک کە پاراستنی سەرجەم هاووڵاتییان، بەهێزکردنی پێگەی دەوڵەت و سەروەریی یاسا دەستەبەر بکات.

ساڵحی متمانەی خۆی بە دانایی سەرکردایەتیی عێراق و پەرۆشیی بۆ نەگرتنەبەری هیچ هەنگاوێک کە گرژی بۆ ئەو ناوچانە بگەڕێنێتەوە دەربڕی، و دووپاتیکردەوە کە دەبێت ئاسایش و سەقامگیریی کەرکوک و خورماتوو وەک ئەولەوییەتێکی نیشتمانی بمێننەوە.