هێزی دەریایی سوپای پاسدارانی ئێران ڕایگەیاند، لە ماوەی دوو هەفتەی ڕابردوودا توانیویانە کۆنتڕۆڵی گەرووی هورمز بکەن و ڕێڕەوەکانی هاتووچۆ تاڕادەیەکی باش بکەنەوە، بەجۆرێک توانای هاتووچۆی کەشتییەکان گەیشتووەتە 50٪ی ئاستی پێش شەڕ.

بەپێی بەیاننامەکە، ئەو کەشتییانەی دەیانەوێت بە تەنگەی هورمزدا تێپەڕن، دەبێت پابەندی ڕێکارە ئەمنییەکان بن و مۆڵەتی پێویست لە هێزی دەریایی سوپای پاسداران وەربگرن.

لە بەشێکی دیکەی بەیاننامەکەدا، سوپای پاسداران هۆشداری توندی داوەتە ئەمریکا و جەختی کردووەتەوە کە "بیانییەکان هیچ پشکێکیان لەو ناوچەیە و گەروی هورمزدا نییە".

هێزەکە ڕایگەیاندووە هەر جۆرە "سەرکێشییەک" یان دەستێوەردانێک لەلایەن سوپای ئەمریکاوە لە دیاریکردنی ڕێڕەوی هاتووچۆ، جگە لە وەڵامی کوشندە، دەبێتە هۆی تێکچوونی پرۆسەی کردنەوەی گەرووەکە و زیان گەیاندن بە بەرژەوەندیی ئەو وڵاتانەی کە لە گەرووی هورمز کەڵک وەردەگرن.