وەزارەتی دارایی و ئابووری حکومەتی هەرێمی کوردستان ئاماری داهاتی باج و خانووبەرەی میری بۆ حەوت ساڵی ڕابردوو بڵاوکردەوە و ڕایگەیاند، کۆی داهاتەکە لە ساڵی 2019 تا کۆتایی ساڵی 2025 زیاتر لە پێنج ترلیۆن و 415 ملیار دینار بووە.

لە چوارچێوەی پەیڕەوکردنی بنەماکانی شەفافیەت و خستنەڕووی کار و چاکسازییەکانی وەزارەتەکە، ئاماژە بەوە کراوە کە لە ماوەی ئەو حەوت ساڵەدا بە هەماهەنگی لەگەڵ ئەنجومەنی وەزیران و لایەنە پەیوەندیدارەکان، چەندین هەنگاوی چاکسازی لە بوارەکانی کارگێڕی، دارایی، یاسایی و تەکنیکی جێبەجێ کراون. ئەم هەنگاوانەش ئامانج لێیان ڕێکخستنی کارەکانی باج، کۆکردنەوەی داهات، و نەهێشتنی خۆدزینەوە بووە لە پێدانی باج.

بەمەبەستی گەیشتن بەو ئامانجانە، وەزارەتی دارایی چەندین ڕێکاری گرتووەتەبەر، لەوانە: بەسیستەمکردنی پڕۆسەی کاروباری باج و خانووبەرەی میری لەگەڵ فەرمانگەی تەکنەلۆجیای زانیاری، ڕێکخستنەوەی باج لە دەروازە سنوورییەکان، پۆلێنکردنی کۆمپانیاکانی گەورە باجدەران، هەڵوەشاندنەوەی بڕیارەکانی لێخۆشبوون لە باجی زەوی پڕۆژەکانی وەبەرهێنان، کەمکردنەوەی زێدەڕۆیی لەسەر موڵکەکانی میری، و هەموارکردنەوەی پەیڕەوی تیانووسی گرتنی بازرگانی.

لە کۆتایی ڕاگەیەندراوەکەدا ڕوون کراوەتەوە کە زۆرترین ڕێژەی داهاتی باج و خانووبەرەی میری لە پارێزگای هەولێر تۆمارکراوە، هۆکارەکەشی بۆ بوونی ژمارەیەکی زۆری کۆمپانیا گەورەکان و بەرزیی ئاستی جووڵەی بازرگانی لە پایتەخت دەگەڕێتەوە، هاوکات باجی هاوردە و هەناردەش بەتەواوی لە خاڵە سنوورییەکان و دەروازەکانەوە کۆدەکرێتەوە.