بەڕێوەبەرایەتیی کۆمەڵگەی دەروازەی نێودەوڵەتیی باشماخ ڕایگەیاند، کێشەی سیستمی ئەلیکترۆنی لە دیوی ئێرانی مەرزەکەوە چارەسەر کراوە و هاتووچۆی گەشتیاری و بازرگانی بە تەواوی ئاسایی بووەتەوە.

لە ڕاگەیەندراوێکدا، هۆبەی ڕاگەیاندن و پەیوەندییەکانی کۆمەڵگەی دەروازەی نێودەوڵەتیی باشماخ ئاماژەی بەوە کردووە، لەدوای چارەسەرکردنی گرفتە تەکنیکییەکانی سیستمی ئەلیکترۆنی لە مەرزی باشماخ-دیوی ئێران، جووڵەی گەشتیاری و جموجووڵی بازرگانی لە مەرزەکەدا دەستی پێکردووەتەوە و وەک ڕۆژانی پێشوو بەڕووی هاووڵاتییاندا کراوەیە.

لە بەشێکی دیکەی ڕاگەیەندراوەکەدا ڕوون کراوەتەوە، دەروازەکە ڕۆژانە لە کاتژمێر 7:30ی بەیانی تاوەکو 9:00ی شەو بە ڕووی هاووڵاتییان و گەشتیاراندا کراوەیە و بە شێوەیەکی ئاسایی خزمەتگوزارییەکانیان پێشکەش دەکەن.