سبەینێ یەکشەممە، بە فەرمی وەرزی هاوین لە هەرێمی کوردستان و نیوەگۆی باکووری زەوی دەست پێدەکات و درێژترین ڕۆژی ساڵیش تۆمار دەکرێت، شارەزایەکی بواری کەشناسییش هۆشداری لە بەرزبوونەوەی پلەکانی گەرما و کاریگەرییەکانی لەسەر سەرچاوەکانی ئاو دەدات.

سالار حاجی عەلی، شارەزای بواری کەشناسی ڕایگەیاند: سبەینێ یەکشەممە (21ی حوزەیرانی 2026)، کاتژمێر 11:24ی پێش نیوەڕۆ بە کاتی هەرێمی کوردستان، وەرزی هاوین دەست پێدەکات. لەو کاتەدا خۆر ڕاستەوخۆ لەسەر هێڵی گەورەی باکووری زەوی دەدرەوشێتەوە، بەمەش ماوەی ڕۆژ لە هەرێمی کوردستان و عێراق دەگاتە 14 کاتژمێر و 8 خولەک؛ خۆر لە کاتژمێر 4:46ی بەیانی هەڵدێت و لە 18:55ی ئێوارەدا ئاوا دەبێت.

ئەو شارەزایەی کەشناسی ئاماژەی بەوەش کرد، پاش 21ی حوزەیران ڕۆژەکان وردە وردە کورت دەبنەوە تا دەگاتە 23ی ئەیلولی 2026، کە تێیدا لە کاتژمێر 3:05ی بەیانی وەرزی هاوین کۆتایی دێت و پاییز دەست پێدەکات. بەمەش هاوین دەبێتە درێژترین وەرزی ساڵ کە ماوەکەی نزیکەی 93 ڕۆژ و 15 کاتژمێرە (واتە 2247 کاتژمێر، یان 134820 خولەک، یان 8،089،200 چرکە).

سەبارەت بە کەشوهەوای ئەم وەرزە، سالار حاجی عەلی ڕوونیکردەوە کە لە مانگەکانی تەمموز و ئابدا پلەکانی گەرما زۆر بەرز دەبنەوە و لە ناوچەکانی گەرمیان و کەرکوک دەگاتە نزیکەی 48 پلەی سەدی و زۆرجاریش لەو ڕێژەیە تێدەپەڕێت. هۆشداریش دەدات کە ئەم کەشە گەرم و وشکە کاریگەری ڕاستەوخۆی لەسەر ئاو، کشتوکاڵ و ژیانی ڕۆژانە هەیە، بۆیە پاراستنی ئاو و بەکارهێنانی ڕێگای نوێی ئاودێری لەم وەرزەدا زۆر پێویستە، لە کاتێکدا ناوچە شاخاوییەکان فێنکترن و دەبنە شوێنێکی گونجاو بۆ گەشتوگوزار.

لە ڕوویەکی دیکەی زانستییەوە، هاوکات لەگەڵ دەستپێکی وەرزی هاوین لە نیوەگۆی باکوور، لە کیشوەری باشووری ئەفریقا، ئەمریکای باشوور و ئوسترالیا کە دەکەونە نیوەگۆی باشوورەوە، لە هەمان ڕۆژی 21ی حوزەیراندا بە فەرمی وەرزی زستان دەست پێدەکات، چونکە وەرزەکان لە هەردوو نیوەگۆکەدا بە تەواوی پێچەوانەی یەکترن.