وەزیری بەرگریی ئیسرائیل ڕایدەگەیەنێت، هێزەکانیان بۆ کاتێکی نادیار لە لوبنان، سوریا و غەززە دەمێننەوە و سەرەڕای فشارەکان بەهیچ شێوەیەک پاشەکشە ناکەن، هەروەها ئاشکراشی دەکات کە نەتانیاهۆ ئەو هەڵوێستەی بە دۆناڵد ترەمپ گەیاندووە.

یسرائیل کاتس، وەزیری بەرگریی ئیسرائیل لە لێدوانێکدا ئاماژەی بەوە کرد، خۆی و بنیامین نەتانیاهۆی سەرۆک وەزیران سیاسەتێکی ڕوون پەیڕەو دەکەن کە جەخت لە مانەوەی سوپای ئیسرائیل لە ناوچە ئارامەکانی لوبنان، سوریا و غەززە دەکاتەوە بۆ کاتێکی نادیار.

جەختیشی لەوە کردەوە کە سەرەڕای هەموو فشارەکان دژی کشانەوەی هێزەکانیانن لە لوبنان و بەپێی پلانەکانیشیان، ناوچە سنوورییەکانی لوبنان لە دانیشتووانەکەی چۆڵ دەکرێن.

لە بەشێکی دیکەی قسەکانیدا، وەزیری بەرگریی ئیسرائیل هۆشدارییەکی توندی دایە تاران و ڕایگەیاند: "ئەگەر ئێران لەسەر بنەمای پێشهاتەکانی لوبنان هێرش بکاتە سەر ئیسرائیل، ئەوا بە هەموو هێزی خۆمانەوە هێرشی دەکەینە سەر و وەڵاممان دەبێت".