سەرچاوەیەکی ئاگادار لە تیمی دانوستانکاری ئێران ڕایگەیاند، تاوەکو ئێستا تاران بڕیاری کۆتایی لەسەر ڕەشنووسی ڕێککەوتننامە پێشنیازکراوەکە نەداوە، هاوکات شاندێکی قەتەری بەمەبەستی ئاڵوگۆڕی پەیامەکانی نێوان ئێران و ئەمریکا گەیشتوونەتە تاران.

ئاژانسی هەواڵی فارس لە زاری سەرچاوەکەوە بڵاویکردەوە: "هێشتا ئێران بڕیاری کۆتایی خۆی سەبارەت بەو ڕێککەوتننامەیە ئاشکرا نەکردووە، بەڵکو هەڵسەنگاندن و لێکۆڵینەوەکان بۆ ڕەهەندە سیاسی، یاسایی و هونەرییەکانی پێشنیازەکان بەردەوامن".

ئاژانسەکە کە نزیکە لە دامەزراوە سەربازی و ئەمنییەکانی ئێرانەوە، ئاماژەی بەوەشکردووە، لێکۆڵینەوە لە ڕەهەندە جیاوازەکانی پێشنیازەکان لەسەر ئاستی شارەزایان و بڕیاردەدەکان بەردەوامە و دامەزراوە پەیوەندیدارەکان بە وردی هەڵسەنگاندن بۆ لایەنە جیاوازەکانی بابەتەکە دەکەن.