لیژنەی کار و ڕێکخراوەکانی کۆمەڵگەی مەدەنی و گەنجان و وەرزش لە پەرلەمانی عێراق ئاشکرای کرد، ئاراستەیەکی ڕاستەقینە لەناو پەرلەماندا هەیە بۆ دۆزینەوەی چارەسەر بۆ ئەو دەرچووە کۆنانەی کە بۆ داواکردنی ماف و ڕەخساندنی هەلی کار خۆپیشاندانیان کردووە، جەختیش دەکاتەوە کە جووڵەی جدی هەیە بۆ دەرکردنی چەند یاسایەکی پاڵپشتیکار و کاراکردنی بازاڕی کار.

عیماد قاسم عەزیز، ئەندامی لیژنەی کار لە پەرلەمانی عێراق، لە لێدوانێکی ڕۆژنامەوانیدا ڕایگەیاند: "هەوڵێکی ڕوون هەیە بۆ قەرەبووکردنەوە و پێدانی ماف بەو خۆپیشاندەرانەی داوای دامەزراندنیان کردووە، هەروەها پەرلەمان ڕۆڵێکی گەورە دەگێڕێت و هەوڵی جدی دەدات بۆ ئەوەی بەمزوانە مافەکانیان بۆ بگەڕێنێتەوە."

قاسم ئاماژەی بەوەش کرد، بازاڕی کار لە عێراق پێویستی بە هەنگاوی کرداری و یاسادانانی ڕاستەقینە هەیە بۆ کاراکردنی، قۆناغی ئێستاش پێویستی بە چاکسازیی جدی هەیە بۆ چارەسەرکردنی بێکاری و ڕەخساندنی هەلی کار بۆ گەنجان و دەرچووان. ڕوونیشیکردەوە، کۆمەڵێک یاسا لەسەر مێزی پەرلەمانن کە ئامانج لێیان پێدانی مافە بە دەرچووان، زۆربەی ئەم یاسایانەش بەشدار دەبن لە کەمکردنەوەی فشار لەسەر کەرتی حکومی و کەمکردنەوەی خەرجییەکان، لە بەرامبەریشدا کەرتی تایبەت بەشێوەیەکی ڕاستەقینە کارا دەکەن.

ئەو ئەندامەی پەرلەمان باسی لەوەش کرد کە یەکێک لە یاسا گرنگە پێشنیازکراوەکان "یاسای کار"ە و ئاراستەیەک هەیە بۆ کاراکردنی بەشێوەیەکی بەرفراوانتر، تاوەکو ژینگەیەکی باشتر بۆ کارپێکردن و وەبەرهێنان بڕەخسێنێت.

جەختیشی لەوە کردەوە کە چارەسەرکردنی دۆسیەی بێکاری ناتوانێت تەنها پشت بە دامەزراندنی حکومی ببەستێت، بەڵکو پێویستی بە بووژاندنەوەی کەرتی تایبەت و ئامادەکردنی ژینگەیەکی ئابووری هەیە کە توانای لەخۆگرتنی تواناکانی گەنجانی هەبێت، پەرلەمانیش چاودێریی داواکاریی خۆپیشاندەران دەکات و کار دەکات بۆ دۆزینەوەی چارەسەری کرداری بۆیان.