بەڕێوەبەرایەتی گشتیی هاتوچۆی هەرێمی کوردستان، لەپێناو پاراستنی ژینگە و پاکڕاگرتنی شەقامەکان، بڕیارێکی نوێی دەرکرد کە تێیدا فڕێدانی زبڵ و خاشاک لەناو ئۆتۆمبێلەوە سزای دارایی توندی بەدوادا دێت.

بەپێی بڕیارەکە، فڕێدانی هەر جۆرە پاشماوەیەک لەلایەن شۆفێر یان سەرنشینەوە، جا لە کاتی ڕۆیشتن بێت یان وەستان، بەتەواوی قەدەغەیە و هەر ئۆتۆمبێل و ماتۆڕسکیلێک سەرپێچی بکات، بڕی (40) هەزار دینار سزای بۆ دەنووسرێت. ئەم هەنگاوەش بەپشتبەستن بە نووسراوێکی وەزارەتی ناوخۆ و بڕیاری ژمارە (79)ی ساڵی (2016)ی ئەنجومەنی وەزیران جێبەجێ دەکرێت.

سەبارەت بە شێوازی تۆمارکردنی سەرپێچییەکە، بەڕێوەبەرایەتییەکە ڕوونیکردووەتەوە کە ئەم سزایە لەسەرجەم سیستمەکانی چاودێری وەکو کامێراکانی تیژڕۆیی و چاودێری و سیستەمی (PDA) جێگیر دەکرێت. هەروەها ئەفسەرانی هاتوچۆ دەسەڵاتی تەواویان پێدراوە لەکاتی بینینی ڕووداوەکەدا ڕاستەوخۆ سەرپێچیکاران سزابدەن.

لە کۆتاییدا، هاتوچۆی هەرێم داوا لە هاووڵاتییان دەکات ببنە هاوکار و لەکاتی بینینی هەر سەرپێچییەکدا، وێنە یان ڤیدیۆی کەسی سەرپێچیکار بنێرن بۆ پەیج و پلاتفۆرمە فەرمییەکانیان بۆ ئەوەی ڕێکارە یاساییەکانیان بەرامبەر بگیرێتەبەر و سزابدرێن.