بەفروباران و کڕێوە بەڕێوەیە و پلەکانی گەرماش بەشێوەیەکی بەرچاو دادەبەزن و کەشناسێک دەڵێت ڕاگەیاندنی پشوی فەرمی پێویستییە.

هەواڵ:KNNC

کەشناسی هەرێمی کوردستان پێشبینییەکانی کەشوهەوای بڵاوکردەوە و ڕایگەیاند: ئاسمان نیمچەهەور هەوری تەواو دەبێت و نمە باران دەست پێدەکاتەوە لەگەڵ بەفر بارین لەسەر ناوچە شاخاویە بەرزەکان و سنوورییەکان.

بەپێی پێشبینییەکان پلەکانی گەرما لەنێوان 4پلەی ژێر سفر و 10 پلەی سیلیزییدا دەبێت، هەروەها پلەکانی گەرماش نزیکەی 8 پلە دادەبەزن و سەرماکەی بەجۆرێک دەبێت کە ساڵانێکە هاوشێوەی نەبووە.

لای خۆشییەوە کەشناس شاڵاو هیدایەت بە کەی ئێن ئێنی ڕاگەیاند: لەمشەوەوە بەفربارین لە ناوچە شاخاویی و بەرز و سنورییەکان دەستپێدەکات و دواتریش ئەو بەفربارینە دادەبەزێتە ناوچە نزیک شاخەکان لە سنوری سلێمانی و هەڵەبجە و ڕاپەڕین و کۆیە، دواتریش دەگۆڕێت بۆ بارانبارین و کڕێوە.

لەبارەی سەرماوە ئەو کەشناسە وتی، ئەگەر چی شەپۆلی بەفرو باران لە سبەینێوە بەرەوە کۆتایی دەچێت بەڵام سەرمای توند درێژەی دەبێت و سێشەممە و چوارشەممە واتا سبەی و دووسبەی سەرمای بەهێز دەبێت و لە بەشێک لە ناوچەکان بۆ چەند پلەیەک ژێر سفر دادەبەزێت و لە ناوچەکانی دیکەش سفر دەبن، واتا تەواوی ناوچەکان پلەکانی گەرما لە ئاستی پلەی بەستن و خوار بەستندا دەبن و ڕاگەیاندنی پشوی سەرتاسەریی پێویستییە....