ئاڵدار خەلیل دەڵێت دەبێت ئاساییشی کورد لە دەستی خۆیدا بێت لە هەموو سوریادا، چونکە حکومەت پابەندی هیچ بەڵێن و پەیمانێکی نابێت، ئەگەر بێت و کورد چەکدار نەبێت وەک عەلەوییەکان کۆمەڵکوژ دەکرێت و کوردیش ملیان بۆ نادات، نیشانی جیهانیش دراوە کە مردنمان پێباشترە لە سەرشۆڕیی

هەواڵ:KNNC


ئاڵدار خەلیل ئەندامی دەستەی هاوسەرۆکایەتی پارتی یەکێتی دیموکرات-پەیەدە لەبارەی ئەو شەڕەی لە هەردوو گەڕەکی شێخ مەقسود و ئەشرەفییەی کوردی ڕوویدا، ئەوەی ڕوویدا ستەمێکی ئاشکرابوو لەلایەن حکومەتەوە بەرامبەر بە خەڵکی سڤیل، چونکە بەپێی ڕێککەوتنی کورد لەوێ ئاساییشی دەپاراست، ئەوان چوار مانگە گەمارۆیان خستوەتە سەر خەڵکەکەی و بابەتەکە تەنها شەڕی 6 ڕۆژە نەبووە.

ئەوەی لە حەلەب ڕوویدا بەرامبەر کورد تەنها حکومەتی سوریا نەبوو، بەڵکو تورکیا بە ڕاستەوخۆ بەشداربووە و ئەردۆغانیش لەپێناو هێرشکردنە سەر کورد دەستی لە حەمماس بەردا، دۆناڵد ترەمپ و تۆم باراکیش بێدەنگبوون ئەگەر بەشداریش نەبووبن، چونکە بینویانە کە چی ڕوودەدا،

لەبارەی بەشداریینکردنی هەسەدە لە شەڕەکە وتی، هەسەدە بەشداریی شەڕەکەی نەکرد چونکە باش دەزانین کە ئامانجی تورکیا و سوریا ئەوەیە هەسەدە بکێشنە ناو شەڕەوە و دەستیان بۆ ناوچەکانی ڕۆژئاوای کوردستان و خۆسەر ببەن.

وتیشی دوای کۆبوونەوەی 4 ئەم مانگەی دیمەشق بڕیاربووە دوای یەک هەفتەی دیکە کۆبوونەوەیەکی دیکە ئەنجام بدرێت بەڵام پێش ئەو وادەیە کە بابەتەکانی گەڕانەوەی کوردانی عەفرین و سەرێکانی و گرێسپی باس دەکران تیایدا، هێرشکرایە سەر کوردی حەلەب و هەموو شتیان تێکدا.

ئاماژەی بەوەشدا کە بۆ هەمووان ڕوونە کێ ڕێککەوتنی کورد و دیمەشقی ناوێت، هەرکات هاکان فیدان دێتە سوریا هەموو شتێک تێکدەچێت و هەر لەبەرئەوەش ڕێککەوتنی 10ی ئازار تا ئێستا جێبەجێ ناکرێت و تورکیا بەربەستی سەرەکییە کە کورد و دیمەشق ڕێکناکەون.

سەرکردەکەی پەیەدە تەواوی ئەو قسانەی ڕەتکردەوە و کە باس لە بوونی پارتی کرێکارانی کوردستان-پەکەکەی کرد لەو گەڕەکانە و وتی هەموو ئەوانە قسەی تورکیان و ڕوونە کە کێ باس لە بوونی پەکەکە و گەریلا دەکات، چونکە پەکەکە نە شەڕی لە دژی حکومەتی سوریایە لە هیچ بنکە و بارەگا و ڕێکخراوێکی لە سوریا هەیە و ئەوانەی لە سوریان پێکهاتەی وڵاتەکەن، ئەوە خەڵکیترە دوای کورد هاتووەتە ناوچەکە.

ڕوونیشیکردەوە، لەپێش کاتی ئاواکردنی کۆماری سوریاوە کورد لە حەلەب بووە و لە ڕەسەنترین خەڵکی ناوچەکەیە و کەس ناتوانێت بڵێت کورد لەو ناوچەیە بوونی نەبووە و حەلەب عەرەبییە، دەبێت هەموو ڕێککەوتنێک بە واژۆی دڵنیایی بکرێت، چونکە حکومەتی سوریا پایمانشکێنە و هیچ بەڵێنێکی ناباتەسەر.

سەرکردەکەی کورد وتیشی، ئەو دوو گەڕەکە شوێنی نیشتەجێبوونی کوردە و هەرواش دەمێنێتەوە و کورد بەجێی ناهێڵێت و بە چەکی خۆی خۆپارێزی لە حەلەب و تەواوی ڕۆژئاوای کوردستان دەکات، چونکە چەک تاکە هۆکاری پاراستنە ئەگەر کورد چەکدار نەبێت وەک عەلەوییەکان کۆمەڵکوژدەکرێت.

لەبارەی چارەسەریی و تورکیاوە وتی، تورکیا بە ناچاری و لە ترسی پەکەکە دەستی بۆ پڕۆسەکە بردوە، ئەگەر نا تورکیا هەموو کورد بە دوژمن دەزانێت لە هەرچوار پارچەکە و ناوچەکە، ئەوەتا کوردانی ڕۆژئاوا لە سوریا هیچ زیانێکیان بۆ تورکیا نییە و بە ئاگر و ئاسن شەڕی کورد دەکات، لە باشوریش کێشە بۆ کورد دروست دەکات کاتێک دەیەوێت کێشەکانی لەگەڵ حکومەتی ناوەندی چارەسەر بکات، دەبێت تورکیا ئەو بیرکردنەوە دوژمنانەیەی بەرامبەر بگۆڕێت و کورد وەک دراوسێی خۆی پەسەند بکات...