سەرۆك وەزیرانی عێراق ڕایدەگەیەنێت، لە رابردودا بودجی سێ ساڵی بوە هۆی سەقامگیری لە خەرجی و پارەداركردنی پڕۆژەكان، بەڵام پێناچێت بۆ بودجەی 2026 پێویستمان بەو شێوازە هەبێت.

هەواڵ:KNNC

محەمەد شیاع سودانی، سەرۆك وەزیرانی عێراق لە بەرنامەیەكی تەلەفزیۆنیدا ڕایگەیاند، چەندین ئاماژەی گرنگمان داناوە بۆ پێداچوونەوەی بودجە لەكاتی دانانی بودجەی ساڵی 2026.

رونیشیکردەوە، ژمارەی فەرمانبەرانی عێراق لە ساڵی 2025دا گەیشتۆتە چوار ملیۆن و 550 هەزار كەس، ئەوە جگە لەوە ژمارەی خانەنشینانی مەدەنی و سەربازیی دو ملیۆن و 960 هەزار كەسن، هەروەها ئەوانەی سوودمەندن لە بەشەخۆراكی مانگانە 43 ملیۆن كەسن و لە بەرامبەریشدا چوار ملیۆن و 500 هەزار كەس بە ناشایستەیی بەشەخۆراكیان پێ‌ دراوە و ئێستا راگیراوە.

سودانی دەڵێت: ساڵانە زیاتر لە 22 ترلیۆن دینار بۆ بەرهەمهێنانی وزەی كارەبا خەرج كراوە، هەروەها بودجەی چاودێری كۆمەڵایەتی گەیشتۆتە شەش ترلیۆن دیناری ساڵانە و 12 ترلیۆن دینار تایبەت كراوە بە پڕۆژە خزمەتگوزارییەكان.

هەروەها دوپاتی کردوەتەوە لەرێگەی چاکسازییەکانەوە، توانیویانە خەرجی و بەهەدەردانی دارایی کەم بکەنەوە و جگە لەوەش بە چاوخشاندنەوە بە گرێبەستەكانی كارەبا توانیویانە 43%ی خەرجی پێشو بگەڕێنینەوە بۆ خەزێنەی دەوڵەت.