ڕاپۆرتی لیژنەی لێکۆڵینەوە لە هێرشەکەی سەر کۆرمۆر خرایەڕوو هێرشکەران بە لە یاسادەرچوو ناسراو دانراون و هەندێکیان داواکراوبوو، وە سەرجەم تاوانباران ڕووبەڕووی ڕێکاری یاسایی دەکرێنەوە.

هەواڵ:KNNC

پاش هێرشەکەی 26ی مانگی ڕابردووی سەر کۆرمۆر و پێکهێنانی لیژنەی هاوبەشی نێوان هەرێم و ناوەند، ڕاپۆرتی لیژنەکە دوای شەش ڕۆژ خرایەڕوو،

سەباح نوعمان وتەبێژی فەرماندەی گشتیی هێزە چەکدارەکان لە ڕاگەیەندراوێکدا ڕایگەیاند: پاش دواییهاتنی ڕاپۆرتەکە، لیژنەی لێکۆڵینەوە لە هێرشەکەی سەر کێڵگەی کۆرمۆر بە سەرۆکایەتیی محەممەد شیاع سوودانی، فەرماندەی گشتیی هێزە چەکدارەکان کۆبوونەوە و ئەنجامی لیژنەی لێکۆڵینەوەکەیان تاوتوێ کردووە و پەسەندکراوە.

بەپێی ڕاپۆرتی لیژنەکە، هێرشەکە لە رێگەی دوو درۆنەوە ئەنجامدراوە و یەکێکیان بەر کێڵگەکە کەوتووە و دووهەمیان لە دەرەوەی کێڵگەکە کەوتووەتە خوارەوە، هەردوو درۆنەکەش لە باشوری کێڵگەکە واتە لە خورماتوەوە ئاڕاستەکراون.

لەبارە بکەرانی هێرشەکە، ئاماژە بەوەداروە، هێرشکەران لەیاسا دەرچوون و هەندێکیان داواکراوبوونە، هەروەها ئێستا هەوڵيکانی دەستگیرکردنی سەرجەمیان بەردەوامە و پاش ئەوە ڕووبەڕووی ڕێکار و سزای یاسایی دەکرێنەوە.

هاوکات گرتنەبەری چەند رێوشێنێکی ئاڕاستەی هەردوو حکومەتی هەرێمی کوردستان و ناوەند کردوە، کە ئەمانەن:

* بڵاوەپێکردنی هێزە ئەمنییەکان لە کەرتی ئۆپەراسیۆنەکانی رۆژهەڵاتی سەلاحەدین بۆ پڕکردنەوەی هەر بۆشاییەکی ئەمنی و بەردەوامیدان بە هەماهەنگی نێوان دەزگا ئەمنیی و هەواڵگری و هێزەکانی ناوچەکە، وە دڵنیاییدنا لە بوونی سەرکردایەتییەک.

* فەرمانکردن بە وەزارەتی بەرگری و ناوخۆ و دەستەی حەشدی شەعبی بە گۆڕینی فەرماندەکانیان لەو ناوچانە بە فەرماندەی بەتوانا.

* پەرەپێدان و بەهێزکردنی کەناڵەکانی پەیوەندیی هەواڵگری لەنێوان دەزگا هەواڵگرییەکانی فیدراڵ و هاوتاکانیان لە هەرێمی کوردستان.

* وەزارەتی بەرگری سیستمی بەرگریی ئاسمانی بە هاوئاهەنگی لەگەڵ حکومەتی هەرێمی کوردستان بۆ کێڵگەکە دابین بکات و بیپارێزێت.

* تووندکردنەوەی رێکارەکانی بەکارهێنان و گواستنەوەی درۆن بە هەموو جۆرەکانییەوە، کە دەبێت بە رەزامەندیی فەرمی لایەنی پەیوەندیدار بێت.

*داوا لە ئەنجوومەنی باڵای دادوەری بکرێت کە لیژنەیەک لەگەڵ ئاژانسە ئەمنیی و هەواڵگرییەکان پێكبهێنێت بۆ بەدواداچوونی لێکۆڵینەوە لەو دۆسیەیە.

لە ڕاگەیەندراوەکەدا جەخت لە بەردەوامی کاری لیژنەکە کراوەتەوە تا گەیشتن بە سەرجەم ئەو کەسانەی کە لە هێرشەکە تێوەگلاون، کە سەروەریی عێراق و سامانە ئابوورییەکەی بە ئامانج گرتووە، ئاماژەوە بەوەشکراوە، کە ئەوە کارێکی تیرۆریستیی مەترسیدارە بە مەبەستی لێدان لە هەوڵەکان بۆ هێنانە کایەی سەقامگیریی ئەمنی و ئابووری، و ئەم کارە تیرۆریستییە بەبێ سزادانی بکەرانی تێناپەڕێت و رێوشوێنی یاسایی تووند لە دژیان دەگیرێتەبەر...