ئه‌مرۆ چوارشه‌ممه‌ كۆشكی کرێملین ڕایگەیاند، ڤلادیمێر پوتین، سەرۆکی ڕوسیا،  به‌شێوه‌ی ئۆنلاین سەرپەرشتی مەشقەکانی هێزە ستراتیژییە ئەتۆمییەکانی وڵاته‌كه‌ی کردووە، کە بریتی بوون لە تاقیکردنەوەی موشەکی بالیستی و کروز لە دەریا و ئاسماندا.
میدیاكانی روسیا له‌زاری پوتینه‌وه‌ بڵاویانكرده‌وه‌، مەشقەکان پێشوەختە پلانیان بۆ دانراوە .

هەواڵ:KNNC

 سوپای ڕووسیا لە سه‌كۆكی موشه‌كییه‌وه‌ کە دەکەوێتە نزیک بازنەی جەمسەری باکوورەوە بەرەو مەیدانی مەشق و ڕاهێنان لە کامچاتکا لە ڕۆژهەڵاتی دووری ڕووسیا، موشه‌كێكی بالیستی تاقیكرده‌وه‌ ، هه‌روه‌ها کرێملین لە راگه‌یه‌نراوێكیدا ڕوونی کردەوە کە ژێردەریایییەکی ڕوسی موشەکێکی بالیستی جۆری سینیڤای بە دوری نزیکەی 11 هەزار و 500 کیلۆمەتر لە دەریای بارێنتسەوە هەڵداوە، هاوکات فڕۆکە بۆمب هاوێژە ستراتیژییەکانی جۆری Tu-95MSموشەکی کروزیان  تاقیكردوه‌ته‌وه‌.

ئەم مانۆڕانە تەنها هەفتەیەک دوای دەستپێکردنی مەشقی ساڵانەی هێزە ئەتۆمییەکانی ناتۆ دێت کە نزیکەی دووهه‌زار کارمەند و 71 فڕۆکە لە 14 وڵاتەوە بەشدارن و مانۆڕەکانیش لە بنکە سەربازییەکانی هۆڵەندا و بەلجیکا و بەریتانیا و دانیمارک و مانۆڕه‌ ئاسمانییەکانیش بەسەر دەریای باکووردا ئەنجام دەدرێن.