بۆ نزیکبونەوەی زیاتر و  کۆبونەوە لەگەڵ دانیشتوان و گۆڕانخوازان، شاندێکی باڵای بزوتنەوەی گۆڕان بە سەرۆکایەتی ڕێکخەری گشتی سەردانی دەربەندیخانیان کرد و لەگەڵ هاوڵاتییان و چین و توێژە جیاوازەکاندا کۆبونەوە.


هەواڵ:KNNC

ئەمڕۆ شەممە، دانا ئەحمەد مەجید، ڕێکخەری گشتی بزوتنەوەی گۆڕان لەمیانی سەردانیکردنی بۆ قەزای دەربەندیخان ڕایگەیاند، هاوڵاتیانی ئەم قەزایە لە تەواوی شۆرشەکاندا بەشداربون و خاوەنی سەدان شەهیدن کە شوێندەستیان دیارە لە شۆڕشی نوێدا.

کاریگەری تەواویان هەبوە لە دروستبونی ئۆپۆزسیۆندا و بە تایبەتیش  دروستبونی بزوتنەوەی گۆڕان و زۆرینەی خەڵکەکەی لەگەڵ گۆڕانخوازیدایە و  کاریگەریان لەسەر دەرەوەی قەزاکەی خۆشیان هەبوە.

جەختیشیکردەوە ئەوانەی ماونەتەوە گۆرانخوازی راستەقینەن و تا ئێستاش بەداخەوە بەو ئامانجانە نەگەیشتون کە هەوڵیان بۆداوە، دڵنیاییشیدا لەوەی بەردەوام دەبن لە خەبات و کاری پێکەوەیی بۆ هەڵستاندنەوەی گۆڕان.

لە بەشیكی دیکەی قسەکانیدا، ڕێکخەری گشتی تیشکیخستە سەر  دیداری گۆڕانخوازان کە لە 20ی 9دا ئەنجامدرا و ڕایگەیاند؛ بەشداری زۆری گۆڕانخوازان   وەڵامێک بو بۆ ئەوەی بڵێین گۆڕان ماوە و دەتوانێت ئێستاش ڕابەرایەتی شەقام بکات.

وێنەکان؛ بڕیار نامیق