ئیبراهیم كاراگیول سەرنوسەری پێشوی رۆژنامەنوسی رۆژنامەی یەنی شەفەق و شرۆڤەكاری تورك لەنوێترین لێدوانیدا داوا لەكاربەدەستانی وڵاتەكەی دەكات دەستپێشخەری بكەن بۆ وەشاندنی گورزی سەربازی لەئیسرائیل بەر لەوەی ئەو وڵاتە دەستی خۆی لەدژی ئەنقەرە بوەشێنێت.
هەواڵ:KNNC
كاراگیول دەڵێت ؛ تابێت چیتر توركیا لەپێگەی بەرگریكردندا بمێنێتەوەو لەئیسرائیل بپاڕێتەوە ئۆپراسیۆنە سەربازییەكانی سنوردار بكات بەڵكو پێویستە ئەنقەرە دەستی خۆی بوەشێنێت و یەكەم گورزی سەربازی لەئیسرائیل بوەشێنێت.
دەشڵێت ململانێی نێوان توركیاو ئیسرائیل هەرگیز كۆتایی نایەت بۆیە نابێت چاوەڕوانی ئەوە بكەین كە تەلئەبیب دەستی خۆی بوەشێنێت .
بەوتەی كاراگیول چۆن ئیسرائیل توانی سوریا لەبەریەكهەڵبوەشێنێتەوە بەهەمان شێوەش كار بۆ هەڵوەشانەوەی توركیا دەكات و پێویستە رێگە نەدەین توركیا بەدەردی ئێران و لوبنان و وڵاتانی تر بچێت كە لەلایەن ئیسرائیلەوە بەئامانج گیراون و سەركردەكانیان دەكوژێت.
1220 جار خوێندراوەتەوە