روانگەی سوری بۆ مافەکانی مرۆڤ ئاماری کوژراوانی لە سوریا لە ماوەی نزیک  دو ساڵی رابردو بڵاوکردەوە و بە پێی ئامارەکە لەوماوەیەدا زیاتر لە دە هەزار کەس کوژراون کە لە ناویاندا ژن ومنداڵیش هەبوە.

هەواڵ:KNN

بەپێی ئامارەکانی ڕوانگەی سوری بۆ مافەکانی مرۆڤ، لە نێوان 8ی کانونی دوەمی 2024 تا 6ی ئەیلولی 2025، 10 هەزار و 672 کەس لە ئەنجامی توندوتیژی و ئاژاوەی ئەمنی لە سوریا کوژراون، کە 8 هەزار و 180 هاوڵاتی مەدەنی بوون، کە 438 منداڵ و 620 ژن بوون.

روانگەکە ئاماژە  بەوەشدەکات کە سزانەدانی تاوانباران و  زیادبونی هەڵمەتەکانی "هاندانی هۆزەکان و بەئامانجگرتنی چالاکوانان و داکۆکیکارانی مافی مرۆڤ" وایکردوە کە  "ئاوەدانکردنەوەی دەوڵەتێکی دادپەروەرانە و دابینکردنی دادپەروەری بۆ لێقەوماوان" لە سوریا،  قورستر بێت.

روانگەی سوریا داوا لە هەمو لایەنە ناوخۆیی و نێودەوڵەتییەکان دەکات کە "خەڵکی مەدەنی بپارێزن، تاوانباران لێپرسینەوەیان لەگەڵدا بکەن، هاندانی هۆز وخێڵەکان  ڕابگرن و دامەزراوەی دادپەروەری دابمەزرێنن بۆ دەستەبەرکردنی مافەکانی هەمو سورییەکان بەبێ جیاوازی."