نوێنەرایەتی نەتەوە یەکگرتوەکان لە عێراق رایگەیاندوە، نیگەرانن و  ئەو وێنە و ڤیدیۆیانەی بڵاوکراونەتەوە، دەرخەری ئەوەن مامەڵەی خراپ لەگەڵ دەستگیرکراوەکانی لالەزاردا کراوە، داواش دەکەن ڕێز لە مافەکانی مرۆڤ بگیرێت و لە ڕێگەی یاساوە چارەنوسی گیراوەکان یەکلای بکرێتەوە.

هەواڵ:KNNC

نوێنەرایەتی نەتەوە یەکگرتوەکان لە عێراق، کە بە یونامی ناسراون لە پێگەی خۆیان لە فەیس بوک بڵاویان کردوەتەوە، گرتە ڤیدیۆییە نائارامکەرەکان دەریدەخەن کە دەستگیرکراوەکانی لالەزار، دوای دەستگیرکردنیان لە شەڕ و پێکدادانەکانی ئەم دواییەی شاری سلێمانی لە هەرێمی کوردستان، خراپ مامەڵەیان لەگەڵ کراوە.

نوسیوشیانە؛  بانگەوازی خۆمان دوپات دەکەینەوە بۆ ڕێزگرتن لە مافەکانی مرۆڤ و بە جێگەیاندنی ڕێکاری یاسایی، بۆ ئەو کەسانەی کە لەم ڕوداوانەدا دەستگیرکراون.

ئەمە دوەمجارە یۆنامی لەسەر روداوەکەی لالەزار لێدوانیان دەبێت، پێشتریش لە راگەیاندراوێكدا نیگەرانی خۆیان خستبوەڕو، داوان کردبو کەسی مەدەنی نەکرێتە ئامانج و ژیانیان پارێزراو بێت.