بزوتنەوەی گۆڕان لە ڕاگەیندراوێکدا بڵاویکردەوە، ئەمڕۆ، یانزە ساڵ بەسەر کارەساتی کۆمەڵکوژی ئێزیدییەکان لە شه‌نگال تێدەپەڕێت، تێپەڕینێک؛ نە تاوانەکە لەسەر ئاستی نێودەوڵەتی بە جینۆساید ناسراوە، نە برینی خوشک و برا ئێزیدییەکان ساڕێژکراوە، نە دەستی ئاوەدانی گەیشتە ناوچەکەیان.

دەقی ڕاگەیندراوەکەی بزوتنەوەی گۆڕان:

کارەساتی جینۆسایدی خوشک و برا ئێزیدییەکان لە (3ی ئابی2014)، کە بووە هۆی کۆمەڵکوژ و گولەباران و زیندەبەچاڵکرانی هەزاران و، لەگەڵیدا ژمارەیەکی زۆر لە کچ و ژنی ئێزیدی ڕفێنران و خرانە بازاڕی کڕین و فرۆشتن و هەزارانیش ئاوارە و بێ ماڵ و حاڵ مانەوە.

مایەی نیگەرانیە، ئەم کەیسە لەسەر ئاستی نێودەوڵەتی و ناوچەیی و عێراقی نەناسێندرا، جگە لە وڵاتانی ئەڵمانیا و بەریتانیا، کە بە فەرمی جینۆسایدی ئێزیدییەکانیان ناساندوە، وڵاتانی دیکە و نەتەوە یەکگرتوەکان و ڕێکخراوە نێودەوڵەتیەکان ئەم تاوانە گەورەیەیان فەرامۆش کرد.

هاوکات، لە ئاستی عێراق و هەرێمی کوردستان، خەڵکی شەنگال و خوشک و برا ئێزیدییەکان تائێستا قوربانین و بەشێوەیەکی کرداری بەپیر خواست و داخوازییەکانیان نەهاتون، دوای ئەو تاوانە خەڵکەکەی قەرەبوونەکراونەتەوە و دۆخی ژیان و ئاسایشی ناوچەکە ئاسایی نەکراوەتەوە، ئەمە جگەلەوەی بە هەزاران ئێزیدی کە ئاوارەبوون نەگەڕێندراونەتەوە سەر زێدی خۆیان.

ئێمە لە بزوتنەوەی گۆڕان، لەکاتێکدا خەم و ئازاری خوشک و برا ئێزیدییەکان بە بیردەهێنینەوە؛ داوا دەکەین هەرچی زووە چارەنوسی بێسەرشوێنەکان دیاری بکرێت و ئەوانەی لە ژیاندا ماون؛ بگەڕێنەوە بۆ ناو ئازیزان و خزم و کەسوکاریان.

بزوتنەوەی گۆڕان
3ی ئابی 2025