کۆمەڵەی پیشەسازی نەوت لە کوردستان (ئەپیكۆر)، ئامادەیی خۆیان بۆ دەستپێكردنەوەی دەستبەجێی هەناردەی نەوت دەردەبڕن بەو مەرجەی رێککەوتن ئیمزا بکرێت و رێز لە گرێبەستەکانیان بگیرێت، داواش دەکەن شایستە داراییەکانیان با کاش پێ بدرێت یاخود لە ڕێگەی گواستنەوەی پشکی شایستە لە نەوت.

هەواڵ:KNNC


لە بەیاننامەیەكدا ئەپیکۆر خۆشحاڵی خۆی بە دانوستانەکانی نێوان حکومەتی هەرێمی کوردستان و حکومەتی عێراق دەردەبڕێت بەوەی گفتوگۆکان چڕتربونەتەوە بۆ گەیشتن بە رێککەوتن و دەستپێکردنەوەی هەناردەکردنی نەوت.

ئەپیكۆردا داوا دەکات هەمو شایستە داراییەکانیان بە خێرایی و شەفافی پێ بدرێت، بەجۆرێك لەلایەن كۆمپانیاكان و حکومەتی هەرێمەوە قبوڵکراو بێت و پارەکە بەكاش یان لە ڕێگەی گواستنەوەی پشکی شایستەیان لە نەوت ئەنجام بدرێت.

مایڵز كاكینز، کە وتەبێژی ئەپیكۆرە دەڵێت: كۆمپانیاكانی نەوت ئامادەن بۆ دەستپێكردنەوەی دەستبەجێی هەناردەی نەوت، دوای واژوكردنی رێككەوتنی نوسراو و رێزگرتن لەو گرێبەستانەیان كە یاسای نێودەوڵەتی ناوبژیوانی دەكات.

دوپاتی دەکاتەوە کە کۆمپانیاکان پابەندن بە گرێبەستی هاوبەشکردنی بەرهەمهێنان لەگەڵ ئەندامەکانیان و هەرگیز بەشدارییان لە هیچ کۆبونەوەیەکدا نەکردوە لەگەڵ هیچ لایەنێكی حکومی، کە ئاماژەیان بە پێچەوانەی ئەمەوە كردبێت.