بنیامین ناتانیاهۆ، سەرۆکوەزیرانی ئیسرائیل ڕایگەیاند، وڵاتەکەی پێشنیاری ستیڤ ویتکۆف، نێردەی تایبەتی ئەمەریکا بۆ ڕۆژهەڵاتی ناوەڕاستی قبوڵ کردوە، بەڵام حەماس ئاگربەست ڕەتدەکاتەوە و نایانەوێت غەززە بەجێبهێڵن، ئێمەش ئەوەمان قبوڵ نییە.

هەواڵ:KNNC

ئەمڕۆ یەکشەممە، بنیامین نەتانیاهۆ لە  تۆڕی کۆمەڵایەتی ئێکس لە گرتە ڤیدیۆییەکدا رایگەیاند؛ "دوای سەردانێکی گرنگ گەڕامەوە، سەردانێکی زۆر سەرکەوتو بو، لەپاش سەرکەوتنێکی گەورە بەسەر ئێراندا.

دەشڵێت؛ "دەرفەتی زۆر و ئەگەری زۆر و ئەرکی زۆر هەیە، من بڕیارم داوە هەمویان بەدەست بهێنم".

لە بارەی ئەو ڕاپۆرتە میدیاییانەی باس لەوە دەکەن ئیسرائیل پێشنیاری ئاگربەستی لە غەززە ڕەتکردۆتەوە، نەتانیاهۆ ڕەتی دەکاتەوە و دەڵێت؛ "قسەی ئەوان هەمیشە دەنگدانەوەی پڕوپاگەندەی حەماسە، بەڵام هەمیشە هەڵە،  ئێمە ڕێککەوتنەکەمان قبوڵ کرد، ڕێککەوتنی ویتکۆف و دواتر ئەو داواکاریانەی کە لەلایەن نێوەندگیرییەکانەوە پێشنیارکرابو ، ئەوە حەماس بو  ڕەتیکردەوە، نەک ئێمە".

ناوبراو باسی لەوەشکردوە کە  حەماس دەیەوێت لە غەززە بمێنێتەوە، ئەوان بکشێینەوە، بۆ ئەوەی خۆیان پڕچەک بکەن و دوبارە و سێ بارە هێ شبکەنەوە سەریان.

لەبارەی بارمتەکانیشەوە، نەتانیاهۆ ڕونیکردوەتەوە کە لە بارودۆخی ئەوان تێدەگات و هەست بە ئازارەکانیان دەکات و لەگەڵ کەسوکاری بارمتەکان کۆدەبێتەوە، جەختیش دەکاتەوە کە  بڕیاریداوە بارمتەکان بگەڕێنێتەوە سەر ماڵ و حاڵی خۆیان و بزوتنەوەی حەماس لەناوببات.