لەسەر پرسی ناوچە سنورییەکان، فەرماندەی هێزە سنورییەکان و وەزیری ناوخۆی هەرێم لە هەولێر  کۆبونەوە و باس لە پەیوەندی نێوانیان  و ئاسایشی کەرتی سنوری و بەهێزکردنی ڕێوشوێنە ئەمنییەکانی بۆ ڕوبەڕوبوونەوەی ئاستەنگ و هەڕەشە سنورەکان کرا.

هەواڵ:KNNC

ئەمڕۆ سێشەممە، لیوا محەمەد عەبدولوەهاب سەکر، فەرماندەی هێزە سنورییەکان و ڕێبەر ئەحمەد، وەزیری ناوخۆی حکومەتی هەرێمی کوردستان،  لە هەولێر کۆبونەوە و  باسیان لە بەرزکردنەوەی هەماهەنگی هاوبەشی ئەمنی کرد.

فەرماندەیی هێزە سنورییەکانی عێراق بڵاویکردوەتەوە،"لە چوارچێوەی پتەوکردنی هاوکاریی هاوبەشی ئەمنی، فەرماندەی هێزەکانی سنوور، لیوا محەمەد عەبدولوەهاب سوكه‌ر ، سەردانی دیوانی وەزارەتی ناوخۆی هەرێمی کوردستانی لە هەولێر کرد، لەوێ لەگەڵ وەزیری ناوخۆ لە حکوومەتی هەرێم، ڕێبەر ئەحمەد کۆبوەوە".

لە ڕاگەیەندراوەکەدا ئاماژە بەوەشکراوە، "لە کۆبونەوەکەدا باس لە ڕێگاکانی فراوانکردنی هەماهەنگی و کردەوەی هاوبەشی نێوان فەرماندەیی هێزە سنوورییەکان و وەزارەتی ناوخۆی هەرێم کرا، بەتایبەتی سەبارەت بە ئاسایشی کەرتی سنووری لە چوارچێوەی کەرتی سنووری هەرێم و بەهێزکردنی ڕێوشوێنە ئەمنییەکانی هاوبەش بۆ ڕوبەڕوبونەوەی ئاستەنگ و هەڕەشە سنوربەزێنەکان".

ئەم کۆبونەوەیە لە کاتێکدایە، رۆژی 12ـی ئایاری 2025 پارتی کرێکارانی کوردستان (پەکەکە) كە ئەنجامی کۆنگرەی (12)ـهەمینی حزبەکەی بڵاوکردەوە و بڕیاری چەکدانانی دا، لەو کاتەوە دەنگۆی ئەوە هەیە کە سوپای عێراق بە هاوبەشی حکومەتی هەرێم شوێن چەکدارانی پەکەکە لە قەندیل بگرنەوە.