وەزارەتی تەندروستی سعودیە رایگەیاند، ئەو حاجییانەی تەندروستییان باش نییە هەستەوەری زیرەکیان پێوەدەبەسترێت، دەشڵێت: سێ نەخۆشخانەی مەیدانییان بۆ بەشدارانی حەجی ئەمساڵ ئامادەکردوە.

هەواڵ:KNNC

بەڕێوەبەرایەتی گشتی پاسپۆرتی سعودیە رایگەیاند، تا ئێستا یەک ملیۆن و 102 هەزار و 496 کەس لە دەرەوەی سعودییە بەڕێگەی ئاسمانی و وشکانی و دەریاییەوە بۆ بەشداری لە مەراسیمی حەجی ئەمساڵ رویان لە وڵاتەکە کردوە.
دەشڵێت: ئاسانکاری تەواو بۆ زیارەتکاران دەکەن.

هاوکات، فەهد جەلاجل، وەزیری تەندروستی سعودیە وتی: هیچ نەخۆشییەکی گوازراوە لە نێو بەشدارانی حەجی ئەمساڵ تۆمارنەکراوە، کە کاریگەری هەبێت لە ئەنجامدانی مەراسیمی حەج.

وتیشی: 11 هێلیکۆپتەری فریاگوزاری، 900 ئۆتۆمبێل و 71 خاڵی پزیشکی لە مەککە دابینکراون، هەروەها سێ نەخۆشخانەی مەیدانی کە زیاتر لە هەزار و 200 قەرەوێڵەیان تێدایە، بەهاوکاری وەزارەتەکانی بەرگری و ناوخۆ و پاسەوانی نیشتیمانی بەڕێوەدەبرێن.

وەزیری تەندروستی سعودیە وتیشی: ئەو حاجییانەی بارودۆخی تەندروستییان ناجێگیرە، هەستەوەری زیرەکیان پێوەدەبەسترێت، کە راستەوخۆ بەستراوەتەوە بە گەورەترین نەخۆشخانە لەسەر ئاستی جیهان.