دوای تۆمارکردنی یەكەم حاڵەتی توشبون بە تای خوێنبەربون لە  کۆیە، تەندروستی شارەکە بۆ پاراستنی هاوڵاتییان و ڕێگریکردن لە نەخۆشییەکە تا کاتێکی نادیار تاکە کوشتارگەی شارەکەی داخست

هەواڵ:KNNC


 بەرپرسی کوشتارگەی کۆیە، دکتۆر خێروڵا خدر رایگەیاندوە، لە پێناو پاراستنی هاوڵاتییانی شارەکە و ڕێگریکردن لە بڵاوبونەوەی نەخۆشی تای خوێنبەربون، تەندروستی شارەکە بڕیاریداوە بە داخستنی کوشتارگەکە.

ناوبراو ئاماژەی بەوەشکردوە، داخستی کوشتارگەکە لەدوای تۆمارکردنی یەکەم حاڵەتی تای خوێنبەربونە لە کۆیە و مەبەست لێی پاراستنی هاوڵاتییانە لە نەخۆشییەکە.

ئەو دکتۆرە وتوشیەتی؛ نازانرێت تا کەی کوشتارگەکە بە داخراوی دەمێنێتەوە، بەڵام بڕیارەکە تەندروستی شارەکە داویەتی و  ئەوانیش وەک کوشتارگەکە پابەندن بە بڕیارەکەوە.

کوشتارگەی کۆیە، تاکە کوشتارگەی شارەکەیە و رۆژانە زیاتر لە 50 ئاژەڵی لێ سەردەبردڕێت.

ئەمە لەکاتێكدایە، ئەمڕۆ هەینی، د.سەرکار سورچی، وتەبێژی وەزارەتی تەندروستی هەرێم رایگەیاند: دوای بەدواداچون و پشکنین بۆ نەخۆشێکی گومانلێکراو لەماوەی دو رۆژی رابردودا،  دوای دڵنیابونەوە و پشتڕاستکردنەوەی پشکنینەکان یەکەم حاڵەتی تای خوێنبەربون لە هەرێمی کوردستان تۆمارکرا.

ئەوەشی خستبوەڕو؛ کە توشبوەكە هاوڵاتیەکی شاری کۆیەیە و تەمەنی (42) ساڵە و پیشەی گۆشتفرۆشە، كە لە ئێستادا دۆخی تەندروستی جێگیرە و لە نەخۆشخانەیەکی شاری هەولێر چارەسەری پزیشکی وەردەگرێت.